الأحد 26 مايو 2024
رئيس التحرير
عمرو عامر
المشرف العام
عبدالعظيم حشيش
تحليل

إيه حكاية "أذون الخزانة" اللى بيصدرها البنك المركزي؟وإزاي تقدر تشتريها؟

الأحد 14/أبريل/2024 - 12:42 ص
البنك المركزي المصري
البنك المركزي المصري

 

في الفترة الأخيرة الحكومة المصرية ممثلة فى وزارة المالية ومن خلال البنك المركزي طرحت للبيع أكتر من مرة "أذون خزانة" وأكيد حضرتك سمعت المصطلح ده كتير الشهور اللى فاتت خصوصا مع عجز الموازنة الواضح فى مصر وكمان الفجوة التمويلية اللى بتعاني منها مصر. فيا ترى ايه هي أذون الخزانة ؟ وليه مصر بتبيعها؟ ومين يقدر يشتريها؟ .. لو عاوز تعرف الاجابة على كل الأسئلة دي تابع هذا التقرير.

 

أذون الخزانة هي نوع من أنواع السندات الحكومية، واللي بتعتبر أداة دين وتقدر تقول ببساطة إنها وثيقة إثبات للدين وضمان لحقوق الداين بتصدرها الحكومة عشان تجمع منها فلوس بهدف دعم الإنفاق الحكومي وسداد الالتزامات وهي ديون قصيرة الأجل لا يزيد أجل استحقاقها على سنة واحدة وبتتراوح آجالها ما بين 3 و6 و9 شهور وعام كامل .

وبتقدم السندات الحكومية مدفوعات فائدة دورية بيطلق عليها مدفوعات القسيمة وبتعادل المدفوعات دي نسبة العائد المتفق عليه وفي بعض الحالات أذون الخزانة ما بتقدمش الميزة دي لكن بتتباع بخصم على قيمتها الأصلية وبتُعتبر السندات الحكومية الصادرة عن الحكومات الوطنية استثمارات منخفضة المخاطر لأن الحكومة المصدرة بتدعمها.

وفي مصر بيبيع البنك المركزي أذون خزانة نيابة عن وزارة المالية، وبيتم تداولها بين البنوك والمؤسسات المالية، اللي تعد اللاعب الرئيسي في سوق أدوات الدين. طب ليه الحكومة بتبيع أذون الخزانة دي؟ الحكومة بتعتمد على السيولة المالية اللى بتوفرها أدوات الدين لتدبير احتياجاتها العاجلة للوزارات والهيئات وبتقدر الحكومة الفجوة بين الإيرادات والمصروفات بحوالى 558 مليار جنيه في موازنة العام المالي 2022- 2023.

واعلنت الحكومة انها هتواجه العجز الكلى المتوقع في موازنة السنة دي من خلال إصدار أذون وسندات بقيمة تتجاوز 1.5 تريليون جنيه، بالإضافة لقروض من مصادر خارجية قيمتها 12.6 مليار جنيه.

 

وليه المستثمرين بيشتروا أذون الخزانة ؟ وبيستفادوا ايه ؟

الإجابة المختصرة والبسيطة هي؛ الربح. الاستثمار في ديون الحكومة هو طريق مختصر لتحقيق أرباح مؤكدة، خاصة مع عرض الحكومات معدلات عائد مرتفعة.. كمان الامان عنصر من عناصر انجذاب المستثمرين لأدوات الدين الحكومة خصوصا ان الحكومة والبنك المركزي بيضمنوا الفلوس بتاعت الأذون دي ورغم انه في معظم الدول بتشارك المؤسسات المالية الكبرى غالبا البنوك طبعا في عمليات تداول السندات الحكومية، فيه جزء كبير منها بيطرح فيما يعرف بالسوق الثانوي اللى من خلاله يقدر المستثمرين الأفراد يستفيدوا من المنتجات المالية الآمنة والمربحة، عبر الاستثمار فيها من خلال مؤسسات مالية ووسطاء ماليين متخصصين و سندات الحكومة بتكون معفاة من الضرائب في كتير من الدول. يعنى استثمار آمن ومربح ومش مكلف خالص