أخطر 5 ملفات على مكتب السيسي في الولاية الجديدة

خلاص انتهى ماراثون الانتخابات الرئاسية وأعلنت الهيئة الوطنية للانتخابات فوز الرئيس عبدالفتاح السيسي بولاية جديدة هتستمر 6 سنين لحد 2030 .. وحصل الرئيس السيسي اللى كان بينافس 3 مرشحين على مجموع أصوات أكتر من 39 مليون صوت بنسبة 89.6% في الاقتراع اللي شهد نسبة إقبال وصفتها الهيئة العليا للانتخابات بـ"الأعلى في التاريخ" حيث بلغت 66.8%
الأرقام بتعكس حجم التأييد الكبير اللى بيحظى بيه السيسي بين غالبية المصريين وثقتهم في استكمال مسيرة التحديات اللى بدأها قبل 10 سنين من دلوقتي.. لكن رغم كده فيه مجموعة كبيرة من المشاكل بتنظر الرئيس في الولاية الجديدة لو قدر يحلها أو يتغلب عليها مصر ممكن تتنقل في حتى تانية خالص.. فيا ترى ايه أهم الملفات اللى ليه أولوية على مكتب الرئيس خلال الفترة الجاية ؟ وازاى هيتعامل مع أزمة نقص العملة اللى بتعتبر أهم وأكبر تحدى للدولة في الكام سنة الجايين؟ 
 

 
الرئيس السيسي هو اكتر واحد عارف مشاكل مصر من شمالها لجنوبها ومن شرقها لغربها ودارس كل ملف وبيتابع بنفسه يوميا تفاصيل الفاصيل في كل الملفات ولو الدنيا مشيت في الطبيعي ومجتش كورونا ولا الحرب الروسية الأوكرانية ومن بعدها العدوان الإسرائيلي على غزة مصر حرفيا كانت هتروح في حتة تانية خالص وده مش كلامنها دي ارقام وتقاير المؤسسات الدولية اللى كانت بتتكلم عن مستقبل الاقتصاد المصري.. لكن للأسف كورونا والغزو الروسي والعدوان الإسرائيلي كان ليهم دور كبير في تراجع الاقتصاد المصري ووجود فجوة تمويلية كبيرة في الموازنة العامة بسبب الفروق اللى حصلت في أسعار الطاقة والحبوب والسلع الغذائية وده تزامن كمان مع تراجع قيمة الجنية والضغوط التضخمية اللى حصلت في آخر سنتين
مصر صحيح اتأثرت باللى حصل في العالم كله لكنها ما تراجعتش وكملت مسيرة البناء.. و أحد الملفات الاقتصادية الرئيسية المرطوحة على اجندة السيسي في الولاية الجديدة هي استكمال المشروعات القومية التنموية الكبيرة، زي المشروعات الزراعية اللى بتهدف إلى تحقيق الاكتفاء الذاتي من الغذاء والسلع الاستراتيجية وتقليل حجم الواردات لتعزيز الصناعة الوطنية وزيادة مساهمة القطاع الخاص في النشاط الاقتصادي بنسبة تصل إلى 65%، وفقا لوثيقة سياسة ملكية الدولة.

بالإضافة كمان لخفض معدل التضخم وتفعيل جهاز الرقابة على الأسواق لضبط الأسعار وتحسين وحماية العملة المحلية ومعالجة نقص العملة الصعبة وعجز الميزان التجاري.
نيجي هنا للسؤال المهم السيسي هيعمل ايه في أزمة نقص العملة الأجنبية واللى تقدر تقول عليها هي أم المشاكل كلها؟ 
بالفعل أزمة نقص الدولار هي السبب في كل المشاكل اللى بتعانى منها مصر هي مثلا السبب في ارتفاع تكلفة الديون الخارجية وهى السبب في ارتفاع أسعار السلع وتنغيص حياة المصريين وعشان كده الرئيس السيسي مركز جدا على التخلص من الأزمة دي وتوفير سولة دولارية كبيرة للقضاء على السوق السودا للعملة ووقف المضاربة على الدولار وزي ما قولنا لحضرتكم قبل كده السيسي شغال على شقين لحل ازمة نقص العملة الأول خارجي وهيستعين فيه بصندوق النقد الدولى من خلال رفع برنامج التمويل من 3 الى 5 مليار دولار في ظل تحسن العلاقات مع الصندوق وكمان فيه دعم هيقدم لمصر من الاتحاد الأوربي بقيمة 10 مليار دولار بالإضافة الى جدولة واسقاط بعض الديون عن مصر.. وكمان اتفاقيات تبادل العملات المحلية مع بعض الدول واللى هتخلى مصر تتخلى عن الدولار في التعاملات التجارية 
أما داخليا فالسيسي بيراهن على تقليل فاتورة الاستيراد لأقل حد ممكن لوقف الضغط على الدولار ومنع استيراد اى منتج ليه بديل محلى وتوطين كتير من الصناعات في مصر بالإضافة الى التعويل على برنامج الطروحات الحكومية المتوقع انه يدر حوالى 10 مليار دولار في 2024 وفقا لخطة الحكومة المعلنة من فترة طويلة. 
وخلونا نقول لحضراتكم ان من أولى أولويات السيسي خلال فترة ولايته الجديدة تثبيت سعر الصرف ومواجهة انخفاض سعر الجنيه أمام الدولار.

ومؤكد ان تحرك الدولة في الاتجاه ده هيؤدي إلى الحد من التضخم الحاصل خلال الشهور اللى فاتت .. كمان ده  هيعقبه سيطرة مباشرة على الأسعار في الأسواق للحد من تجاوزات التجار بشكل كبير بسبب عدم ثبات سعر الجنيه أمام الدولار.
وخد بالك كمان ان انضمام مصر كعضو رسمي في تجمع بريكس هيقلل من الضغط على العملة الصعبة في المعاملات التجارية بين مصر ودول التجمع بالاستخدام المحلي للعملات.