دولار السوق السوداء ينهار.. خبطات المركزي تحقق الهدف المطلوب

الناس اللى بتتعامل فى السوق السودا لصرف العملات الأجنبية اكيد لاحظوا ان فى آخر 48 ساعة سعر الدولار فى السوق السودا بدأ يتراجع بشكل ملحوظ وحاليا بيتم تداول العملة الأمريكية عند مستوى 48.90 جنيه للشراء 50.10 جنيه للبيع بعد ما كان السعر وصل الى 52 و53 جنيه فى الأسابيع اللى فاتت.. فيا ترى ايه سبب التراجع اللى حصل فى دولار السوق السودا؟ وايه المتوقع يحصل الأيام الجاية ؟ وهل التحركات اللى عملها البنك المركزي ليه دور فى انهيار السوق السودا للعملة؟
 

 
فيه كام حاجة حصلت الأسبوع الأخير كانت ليها تأثير واضح وقوى على سوق صرف العملات الأجنبية فى مصر وتحديد السوق الموازية اللى بتشهد فوضى كبيرة وبيتحكم فيها مافيا بتضم مضاربين وتجار كبار فى سوق الدهب بالاضافة الى جماعات ودول بتحاول تزود الفوضى دي وتستفيد منها فى تحقيق أهداف سياسية واقتصادية 
وعشان كده البنك المركزي بدأ يتحرك عشان يحط نهاية للفوضى دي ويقضى تماما على السوق السودا للعملة لأن استمرارها بالشكل ده ليه تأثير سلبي على مناخ الاستثمار وعلى حياة الناس فى مصر. 
وكان من أهم التحركات اللى أدت الى تراجع دولار السوق السودا تهديد البنك المركزي للشركات المصرية اللي بتبيع السلع بتاعتها بالدولار داخل مصر بتعطيل حسابتهم ومسائلتهم قانونيا لأن اللى بيعملوه ده وفقا لقانون البنك المركزي والقطاع المصرفي يعتبر جريمة ليها عقوبات قاسية بتوصل للحبس وغرامات مالية بملايين .. وبعض البنوك بتعليمات من البنك المركزي عطلت حسابات المواطنين اللى بيتعاملوا مع الشركات داخل مصر بالدولار. 
ووزارة المالية اتحركت هي كمان وفرضت ضريبة القيمة المضافة بالدولار على أى شركة بتبيع منتجاتها بالعملة الأمريكية.. و الحكومة وصلت رسالة تحذير لتجار الدهب بالتحديد وقالتلهم لو السوق ما استقرتش مش هيكون فيه حوافز تانى لمصنعى الدهب ولا امتيازات لعمليات التصدير اللى بتتم للمعدن النفيس 
مش بس كده  الحكومة نجحت فى الفترة الخيرة فى الافراج عن كمية كبيرة جدا من البضايع وطبعا ده خلا الاقبال على الدولار قل لأن كل المستوردين اللى عندهم بضايع فى الموانئ الحكومة وفرتلهم الدولار اللى محتاجينوا 
وكل ده تزامن مع اخبار كتير مبشرة عن توافر العملة الأجنبية كان اهمها تخصيص الاتحاد اوربي 10 مليار دولار لمصر فى اطار توسيع الشراكة مع القاهرة والتعاون فى ملفات مهمة زي التصنيع ومشروعات الاقتصاد الأخضر.. ومع ده كمان تم الاعلان عن قرب الاتفاق بين مصر والسعودية على اتفاقية مبادلة عملات هيتم من خلالها الاستغناء عن الدولار فى التعاملات التجارية وهيتم سداد الالتزامات بالجنيه والريال