أخطر جملة قالها السيسي.. محدش خد باله منها خالص

 
بسبب اللى بيحصل في غزة ومن قبلها الأوضاع الاقتصادية الصعبة اللي بيعيشها الناس في مصر كان فيه كلام مهم جدا للرئيس السيسي محدش وقف عنده.. ولا فهم الرئيس يقصد من وراه إيه.. وليه قاله في الوقت ده تحديدا.. وعشان نفكر حضراتكم باللى اتقال هنرجع بيكم كام يوم لورا تحديدا يوم 30 سبتمبر اللى فات لما كان الرئيس السيسي بيشارك في مؤتمر "حكاية وطن" اللى كان بيرصد حجم الإنجازات اللى اتحققت من وقت وصول الرئيس السيسي للحكم ولحد دلوقتي.. يومها الرئيس السيسي قال ان حلم المصريين لازم  يكون أكبر من لقمة عيش.. والكلمة دي عدت على ناس كتير ومحدش انتبه للمعنى اللى كان بيقصده الرئيس.. فيا ترى ليه الرئيس السيسي قال الجملة دي ؟ وليه حلم المصريين فعلا لازم يكون أكبر من كده بكتير ؟ وازاى الدولة هتحقق أحلام الرئيس لمصر والمصريين؟ 
 

 
مفيش شك مصر بتعيش ظروف اقتصادية صعبة زيها زي كل دول العالم تقريبا بسبب تداعيات الغزو الروسي لاوكرانيا والتأثيرات الكبيرة على أسعار كتير من السلع وتحديدا أسعار الحبوب والطاقة.. وبسبب اللى حصل ده معظم السلع الأساسية سعرها زاد بشكل غير مسبوق نتيجة ارتفاع سعر الدولار في الوقت اللى مصر بتعتمد فيه على استيراد معظم احتياجاتها من الخارج.
طبعا ارتفاع الأسعار خلا كتير من الناس كل حلمهم توفير لقمة العيش.. لكن مش ده الهدف الكبير اللى بيشتغل عليه الرئيس السيسي اللى من أول يوم ليه في الحكم كان تفكيره توفير حياة كريمة لكل المصريين وحتى الغلابة ومحدودي الدخل ما نسيهمش وعلمهم مبادرة رئاسية خاصة هي مبادرة حياة كريمة اللى حسنت حياة الناس في القرى والنجوع وعمل كمان مبادرة رئاسية مهمة هي تكافل وكرامة واللى كانت سبب في توفير دخل دائم لكتير من الأسر الفقيرة اللى معندهاش دخل ولا فيها راجل ولا ست شغالين 
لكن الرئيس دايما بيبص لبكره وبيحلم لمصر والمصريين بالأحسن وعشان كده بيشتغل على خطط وأفكار هتعمل تنمية غير مسبوقة في مصر ومع التنمية مستوى الاقتصاد هيتحسن ومعاه هتتحسن حياة المصريين ومش هيبقا هم المواطن يلاقي لقمة العيش لأ هم المواطن هيبقا ازاى يرفع من مستواه المعيشي يسكن في أحسن الأماكن ويمتلك عربية ويعلموا ولاده في أحسن مدارس لكن ده مش هيحصل بين يوم وليلة ولا هيتم بالتواكل والأمنيات .. الموضوع محتاج وقت وجهد من الجميع عشان البلد تنهض وعجلة الإنتاج تدور. 
بص كده على المشروعات الجديدة اللى بيعملها السيسي في كل حتة في مصر وانت تعرف الراجل ده مش بيفكر للنهاردة ولا يكره ده بيخطط للبلد بعد 50 سنة من دلوقتى عشان يحطها في المكانة اللى تستحقها ويوفر للمصريين حياة كريمة قايمة على الجودة والتميز في كل مناحى الحياة في البيت والشغل في المواصلات العامة في مراكز الإنتاج في أماكن التصدير في الأماكن السياحية في كل حتة في مصر فيه جهد بيتبذل ومحاولة لتغيير الواقع بواقع جديد أجمل.
وعشان كده الرئيس السيسي عاوز يعلى أحلام المصريين وما يبقاش هم الناس لقمة العيش وخلاص لأن توفير لقمة العيش أمر مفروغ منه والحكومة شغالة عليه لكن الموضوع اكبر بكتير من لقمة العيش الموضوع ان مصر تنهض وتقوم وتقف في المكانة اللى تستحقها وده بشكل طبيعي هينعكس على حياة الناس