لو عايز تجوز العيال أو هاتعمل مشروع ومحتاج فلوس.. شوف الفيديو دا

عايز قرشين تجوز بيهم العيال عندنا الحل،محتاج فلوس تعمل بيهم مشروع،لو أنت من أصحاب المعاشات يبقى لازم تشوف الفيديو دا

اوع تفتكر أن دي نهاية المطاف.. طالما بلغت السن القانوني وطلعت على المعاش

لأ أنت تقدر دلوقتي تاخد فلوس من البنك وتبدأ في عمل مشروع تجاري بعد المعاش.. أو تجيب نفس القرشين وتجهز ولادك.

خلينا نقول لحضراتكم إن البنوك دايما بتوفر منتجات بنكية متنوعة.. سواء شهادات أو ودائع أو قروض والأخيرة هي اللي هانتكلم عليها النهاردة

دلوقتي البنوك بتقدم قروض شخصية  مختلفة لجميع فئات المجتمع ومن بين القروض اللي بتطرحها البنوك قروض لاصحاب المعاشات.

طبعا في ناس واخدة انطباع عن القرض بأنه شر مطلق وأن اللي هايخد القرض هايتحبس في النهاية.. ودا مش حقيقي لو حضرتك تعاملت مع الموضوع بحسبة بسيطة وبجدية.

القروض لو أنت محتاجها لازم تدرس في الأول وضعك المالي وتبدأ بعد كدا تاخد خطوات مدروسة.. وعلى رأسها أنك تحسب.. هل دخلك يسمح بالقرض ولا لأ؟ بمعنى هل هايكون عندك وفرة مالية تدفع قسط القرض وفي نفس الوقت الباقي تقدر تعيش بيهم ولا لأ؟

طبعا في ناس كتير بلغت سن المعاش ومحتاجة فلوس تفتح مشروع أو تساعد ولادك علشان الجواز اللي بقى تكاليفه غالية دلوقتي ولا لأ

إحنا النهاردة هانتكلم عن القروض الممنوحة لأصحاب المعاشات في أبرز ٣ بنوك حكومية

أول بنك معانا هو البنك الزراعي المصري واللي بتصل قيمته ل نص مليون جنيه.. بس دا الحد الأقصى في البنك دا.. لكن انت تقدر تاخد قرض بداية من ٥ آلاف ولحد ٥٠٠ ألف زي ما قولنا.

والبنك دا.. بيديك القرض بفايدة تبلغ 18.25٪.. وكمان الفائدة متناقصة يعني الفايدة هاتقل بعد كل سنة من سداد الأقساط.

طبعا القرض هاتاخده بضمان تحويل المعاش.. بس لازم يكون الحد  الادني للمعاش هو 900 جنيه.

الميزة في القرض دا.. هو أنك تقدر تسدد على ١٠ سنين.. والبنك هايقولك تقدر تسدد قد اية كل شهر.

كل اللي عليك انك تروح أي فرع للبنك ويكون معاك مستندات زي  صورة بطاقة الرقم القومي وإيصال مراف وبيان مفردات المعاش.

ثانيا في  قرض أصحاب المعاشات من البنك الاهلي المصري.. ودا فايدته أعلى شوية واللي بتصل ل 19%.

وبرضوا الفايدة هاتقل مع السنين لأنها فايدة متناقصة.. وقيمته هي هي قيمة القرض اللي بيقدمه البنك الزراعي المصري واللي بتبلغ ٥٠٠ ألف جنيه.

وبرضوا مدة السداد بتصل ل  10 سنوات... وطبعا البنك مابيخدش اكتر من ٥٠٪ من قيمة راتبك.

وهي هي المستندات اللي بيطلبها البنك الزراعي المصري هي بالظبط اللي هايطلبها منك البنك الأهلي المصري.. وهي صورة بطاقة الرقم القومي وإيصال مراف وبيان مفردات المعاش.

أخيرا في قرض من بنك التعمير والإسكان.. واللي قيمته مرتفعة شوية وبتصل ل مليون جنيه.. وتقدر تاخد أقل من كدا طبعا لأن الحد الأدنى هو ٣ آلاف جنيه.

والبنك دا بيقدم فايدة على القرض بتبلغ 19.5%.. وبرضوا هي فايدة متناقصة.. وتقدر تستمله بضمان تحويل المعاش.. وهاتسدده على ١٠ سنين.. بس لازم يكون الحد الأدنى لدخلك هو ١٢٠٠ جنيه.