الحدث اللي هيهز العالم.. المخابرات الأمريكية مرعوبة ومش عارفين يعملوا إيه؟
بعد يومين بالظبط هيعقد اهم اجتماع في ٢٠٢٣ .. اجتماع كل العالم مستنيه وبيترقب نتايجه من اول السنة.. وبناء على اللى هيحصل فيه حاجات كتير هيتقلب حالها فى العالم كله... وخلي بالك المخابرات الامريكية بنفسها مرعوبة من اللى ممكن يحصل بعد الاجتماع ده والمسؤولين في البيت الأبيض قاعدين يحطوا سيناريوهات ويدرسوا ازاي ممكن يتعاملوا مع نتايج اجتماع ٢٢ أغسطس.. فيا ترى ايه حكاية الاجتماع ده ؟ وايه الحاجات المهمة اوي اللي هيناقشها؟ وليه الأمريكان هما اكتر ناس خايفين من اللي هيحصل في الاجتماع ده؟
خلاص فاضل يومين وهتستضيف جنوب افريقيا اجتماع في غاية الأهمية والخطورة.. اجتماع النتايج اللى هتترتب عليه هتعمل انقلاب حرفيا في موازين القوى في العالم وهتغير كتير من قواعد اللعب في دنيا الاقتصاد.. وبدون مبالغة لو نجح الاجتماع ده تقدر تقول انه أول مسمار هيدق في نعش الدولار وأول خطوة حقيقية لانهاء هيمنة العملة الأمريكية على التجارة العالمية
والاجتماع اللى بنقول لحضراتكم عليه هو اجتماع مجموعة او تكتل بريكس اللى بيضم لغاية دلوقتى 5 دول رئيسية هي الصين وروسيا وجنوب افريقيا والهند والبرازيل وبيعتبر واحد من أهم وأكبر التجمعات السياسية والاقتصادية اللى هيكون ليه نفوذ كبير على المسرح العالمي خلال السنين الجاية.
طب ليه الاجتماع ده مهم وخطير؟
اجتماع 22 أغسطس بيكتسب أهميته من أكتر من حاجة.. أولها ان الاجتماع هيناقش لأول مرة طلبات مقدمة للتجمع من أكتر من 15 دولة للانضمام الى بريكس والدول دي منها أسماء كبيرة وعملاقة في منطقة الشرق الأوسط والعالم زي مصر والسعودية والامارات ودول تانية كتير عندها رغبة في عضوية بريكس والاستفادة من الخدمات اللى هيقدمها التجمع لأعضاؤه مستقبلا
طب ايه تانى هيتم مناقشته في الاجتماع المهم والخطير ده؟
في الاجتماع ده هتبحث الدول الأعضاء ومن بينهم روسيا والصين طبعا مشروع كبير لاستحداث عملة عالمية جديدة بديلة للدولار تكون مكون رئيسي في الاحتياطي النقدي للدول وكمان يكون ليها حصة كبيرة في حركة التجارة العالمية ومشروع زي ده لو خرج للنور فدي هتكون ضربة قاتلة للعملة الأمريكية الدولار اللى بقالها عقود مسيطرة ومهيمنة على مكونات الاحتياطي النقدي من العملات الأجنبية في معظم البنوك المركزية حوالين العالم وكمان هي أكبر عملة بيتم الاعتماد عليها في التجارة العالمية وده واضح جدا وبصورة أكبر في تجارة النفط في العالم كله.
وعشان كده المخابرات الأمريكية بنفسها بتراقب وبتحاول تعرف ايه اللى هيحصل في اجتماع بريكس ومن خلال علاقات واشنطن الممتدة مع كتير من الدول بتحاول تستخدم نفوذها عشان تبوظ اى خطط لاستحداث عملة عالمية جديدة لأن ظهور عملة زي كده معناه على المدى البعيد زوال هيمنة الأمريكان اللى بيستمدوا قوتهم من قوة الدولار وكلنا شفنا بعد الحرب الروسية الأوكرانية ازاى الدولار طاح في كل العملات حتى العملات الكبيرة زي اليورو والاسترليني وغيرهم، ويمكن ده اللى مخلى فيه ترحيب حتى من دول اوربية بالتحركات اللى بتعملها بريكس
وليه الأمريكان هما أكتر ناس مرعوبين من اللى ممكن يحصل في اجتماع 22 أغسطس؟
بص يا سيدي الاجتماع ده معمول أصلا عشان دول بريكس تبحث خطوات جدية للتحرر من هيمنة الدولار وتقليل نفوذه في حجم التجارة العالمية وكمان الاحتياطيات النقدية للبنوك المركزية حوالين العالم.. ودي أهم نقطة قوة للامريكان مخليهم مسيطرين على كل حاجة حرفيا في العالم ونجاح بريكس في الخطوة دي هيعنى سحب البساط من تحت الأمريكان وهيعنى كمان بشكل واضح بداية النهاية للدولار باعتباره العملة الأقوى في العالم.
وهل فعلا الاجتماع ممكن ينجح في تحقيق الأهداف بتاعته؟
روسيا ومعاها الصين شغالين بكل تقلهم في الملف ده وبيستغلوا علاقاتهم ونفوذهم في كتير من الدول للوصول الى اتفاقيات دولية منها مبادلة العملات والتعامل بالعملات المحلية وشفنا الفترة اللى فاتت اتفاقيات كتير بدات تدخل حيز التنفيذ وتسوية الصفقات بقا بيتم بالعملات المحلية مش بالدولار وكل دي مقدمات للتخلى عن الدولار وهو ده اللى عامل ذعر للأمريكان
