10 أضعاف في 4 سنوات.. الشوكولاتة المصرية تغزو الأسواق العالمية
تخيل إن الشوكولاتة المصرية اللي بنشتريها من المحلات والسوبر ماركت، بقت واحدة من المنتجات الغذائية اللي بتحقق طفرة في التصدير.. والأرقام المرة دي مش بسيطة خالص.
صادرات الشوكولاتة المصرية سجلت 343 مليون دولار خلال أول 9 شهور من 2026، مقارنة بـ175 مليون دولار في نفس الفترة من 2025، يعني نمو بنسبة 96% في سنة واحدة بس.
لكن المفاجأة الأكبر لما نرجع لأربع سنين ورا.. في 2022 صادرات الشوكولاتة المصرية كانت حوالي 33 مليون دولار خلال أول 9 شهور، يعني إحنا بنتكلم عن زيادة وصلت لأكتر من 10 أضعاف، وبنسبة نمو حسابية تقارب 939%.
والأغرب إن مصر مش دولة بتزرع الكاكاو تجاريًا، لكنها نجحت في تحويل المواد الخام ومشتقات الكاكاو المستوردة لمنتجات نهائية بتنافس في الأسواق العالمية.
والدليل على حجم الطفرة دي إن مصر احتلت المركز العاشر عالميًا في تصدير ألواح وقوالب الشوكولاتة المحشوة خلال 2025، بصادرات وصلت لـ251 مليون دولار، وبكميات بلغت 33 ألف طن.
ومن أبرز الأسواق اللي بتستقبل الشوكولاتة المصرية: السعودية والإمارات والكويت وبريطانيا وقطر.
ومن أهم أسباب القفزة دي وجود مصانع لشركات عالمية في مصر، زي مارس وموندليز ونستله، بجانب الشركات المصرية.
ومصنع مارس في مدينة 6 أكتوبر لوحده بيصدر منتجاته لـ58 دولة حول العالم، وصادراته بتمثل حوالي 93% من إجمالي إنتاجه، كمان بيعتمد على مدخلات محلية بنسبة 70%.
يعني مصر مش بتصدر كاكاو خام، لكنها بتصدر منتج صناعي كامل، وبتحول المواد الخام المستوردة لصناعة بتدخل ملايين الدولارات من العملة الصعبة.
والسؤال دلوقتي: هل تقدر صادرات الشوكولاتة المصرية توصل لنص مليار دولار قبل نهاية 2026؟
