اعتراف أمريكي خطير عن مستقبل الدولار.. إيه اللي بيحصل بالظبط؟

 
من بعد الحرب الروسية الاوكرانية والعقوبات اللى فرضتها الولايات المتحدة الأمريكية على روسيا واستخدام الدولار كسلاح في الصراع مع نظام الرئيس بوتين وكل دول العالم بدأت تعيد حساباتها وتفكر إزاي ممكن تتخلى عن العملة الأمريكية عشان متفضلش تحت رحمة الأمريكان.. وفى الكام شهر اللي فاتوا ظهرت افكار كتير وتحركات أكتر هدفها البحث عن عملة بديلة للدولار فى حركة التجارة العالمية وكمان فى حجم الاحتياطي النقدي من الدولار.. ورغم نفي الأمريكان تأثر عملتهم بالتحركات دي وان العالم ما يقدرش يستغني عن الدولار بدأنا نسمع مؤخرا كلام مختلف وتصريحات لرجال أعمال كبار بيحذروا من خطورة اللى بتعملوا الادارة الأمريكية.. والنهاردة حصل تطور جديد وخطير فى نفس الوقت.. والتحذيرات ما بقتش من خبراء ولا من رجال مال وأعمال بس لا دي بقت تصريحات رسمية .. فيا ترى ايه اللى حصل ؟ وتأثيره إيه على مستقبل الدولار؟ 
 
يوم التلات اللى فات كان فيه جلسة استماع في اللجنة المالية التابعة لمجلس النواب الأمريكي لمناقشة مصير الدولار ومعرفة حجم تأثير التحركات اللى بتتم للتخلى عن العملة الأمريكية ، وحضرت الجلسة دي وزيرة الخزانة الأمريكية جانيت يلين اللى اعترفت رسميا بان هيمنة الدولار بقت فى خطر .. وقالت ان الولايات المتحدة لازم تتوقع انخفاض حصة الدولار من الاحتياطيات العالمية.
ولما اتسألت وزيرة الخزانة الأمريكية عن هل ممكن العقوبات الأمريكية تأثر على  معاملات الدولار اعترفت بان استخدام العملة كسلاح دفع بعض الدول للبحث عن بدايل للدولار.. وقالت ان الدولار بيلعب الدور اللي بيلعبه في النظام المالي العالمي لأسباب وجيهة للغاية لا تستطيع أي دولة تانية تكرارها بما فيها الصين خصوصا ان أمريكا عندها أسواق مالية مفتوحة عميقة وسيادة قانونية قوية.

ولما نائب سألها هل الأفضل ان امريكا تبطأ استخدام العقوبات وقال انه حتى الدول المتحالفة مع الولايات المتحدة زي فرنسا أجرت مؤخرًا معاملات بغير الدولار وزيرة الخزانة قالت انه مفيش حل بديل حقيقي لمعظم الدول لاستخدام الدولار كعملة احتياطية.
وقالت لازم نتوقع بمرور الوقت زيادة تدريجية في حصة الأصول الأخالتانية رى في الحيازات الاحتياطية للدول بعيد عن الدولار وان دي  رغبة طبيعية من البنوك المركزية في تنويع الاحتياطي بتاعها. 
وفى اخر 20 سنة تراجع الاعتماد على الدولار فى الاحتياطيات النقدية فى معظم البنوك المركزية حول العالم وشهد انخفاض حاد فى 2022 وأشارت تقارير كتيرة  إلى تصاعد طلب البنوك المركزية الأجنبية على الدهب كوسيلة أخرى لتقليل اعتمادها على احتياطيات الدولار.