رسائل حاسمة من السيسي.. يا ترى الرئيس قال إيه عن الاستثمار وقناة السويس؟
هو العالم شايف مصر ازاي دلوقتي؟ وهل اللي حصل في المنطقة هز اقتصادها ولا زوده صلابة؟ وايه الرسايل اللي الرئيس السيسي حب يوصلها من قلب دافوس للعالم كله؟ وليه قناة السويس كانت في صدارة الكلام وايه هو التمن الحقيقي اللي مصر دفعته؟
من دافوس الرئيس عبدالفتاح السيسي خرج برسائل مباشرة وحاسمة وقال بوضوح إن مصر مكملة في طريق الإصلاح الاقتصادي مهما كانت التحديات ومهما كانت الضغوط الاقليمية والدولية والرسالة الاهم إن البلد دي مش بتشتغل بالظروف لكن بتشتغل بالرؤية.
الرئيس قال إن الحرب في غزة كان ليها تأثير مباشر وكبير على الاقتصاد المصري وكشف رقم مهم جدا لما أكد إن مصر خسرت حوالي 9 مليار دولار من العوائد المباشرة لقناة السويس بسبب تداعيات الحرب وده رقم ضخم بيعكس قد ايه المنطقة كلها بتدفع تمن عدم الاستقرار.
لكن الرسالة هنا مش شكوى قد ما هي توضيح للعالم إن مصر رغم الخسارة الكبيرة دي لسه واقفة ومكملة اصلاح وبتبني اقتصادها على المدى الطويل وده معناه إن القرارات اللي اتاخدت قبل كده كانت قرارات صح.
السيسي أكد إن برنامج الاصلاح الاقتصادي مستمر وإن الدولة شغالة على تعزيز دور القطاع الخاص بشكل حقيقي من خلال التخارج الحكومي من بعض الانشطة وده بيدي مساحة اكبر للقطاع الخاص إنه يكبر ويتوسع ويقود النمو.
كمان الرئيس اتكلم عن وثيقة سياسة ملكية الدولة وبرنامج الطروحات الحكومية ووضح إن الحاجات دي مش شعارات لكن خطوات عملية بتتنفذ وهدفها شراكة حقيقية مع المستثمرين مش بس جذب فلوس لكن بناء اقتصاد مستدام.
ومن اهم النقاط اللي اتكلم عنها الرئيس هي البنية التحتية وقال إن اللي اتعمل في السنين اللي فاتت غير شكل الاستثمار في مصر لان مفيش مستثمر ييجي من غير طرق ومواني وطاقة وشبكات قوية وده اللي الدولة ركزت عليه.
الرئيس كمان كشف إن الخطة الاقتصادية المصرية مش تقليدية لكنها شاملة وبتستهدف قطاعات المستقبل وعلى رأسها الذكاء الاصطناعي مع التأكيد إن توفير الطاقة هو الاساس لاي تطوير صناعي او تكنولوجي.
وفي السياسة الخارجية السيسي كان واضح إن سياسة مصر قائمة على الاستقرار في منطقة مضطربة وان القاهرة بتشتغل على بناء شراكات اقليمية ودولية تحقق مصلحة متبادلة مش مصالح مؤقتة.
كمان شدد إن مصر مكملة في دورها الفاعل لتحقيق الامن الاقليمي والدولي وان مفيش سلام حقيقي في الشرق الاوسط من غير حل عادل للقضية الفلسطينية.
السيسي ربط بشكل مباشر بين استقرار فلسطين واستقرار المنطقة كلها وتأثير ده على الاقتصاد العالمي وقال إن مصر مش هتوفر جهد في الوصول لحل شامل وعادل والبناء على اللي تحقق في قمة شرم الشيخ وتثبيت وقف اطلاق النار في غزة.
رسايل السيسي من دافوس كانت واضحة مصر دولة بتدفع تمن الاستقرار لكنها في نفس الوقت بتبني اقتصاد قوي ومفتوح على العالم وبتقول للمستثمرين إن اللي يحط رجله هنا بيحطها على ارض صلبة ورؤية طويلة المدى.
