عن الدولار والأكل والشرب.. تصريحات مهمة من الرئيس السيسي اليوم خلال جولته بالبحيرة

خلال جولة الرئيس عبدالفتاح السيسي، اليوم، في قرية الأبعادية في البحيرة، اتكلم عن ملفات غاية في الأهمية، خاصة عن الدولار والاستيراد والزيادة السكانية.

بالنسبة للدولار.. الرئيس السيسي، قال إن لو إنتاجية الأرض ماغطتش احتياجات الناس بنضطر نشتري من برة.. ودا له تأثير كبير جدًا على الأسعار في مصر.. لأن الاستيراد يعني فاتورة الدولار هاتزيد.. ودا بيمثل عبء على الاقتصاد.

وقال كمان.. إن  زمان من 40 سنة و50 سنة كان الريف بيغطي حاجته.. والبيوت في الريف كانت عبارة عن وحدة إنتاجية.. بمعنى إنه بيغطي نفسه وبيطلع جزء للحضر.. لكن دلوقتي.. الدولة أصبحت معنية بأنها تغطي كل الطلبات.

الرئيس السيسي كمان اتكلم عن الزيادة السكانية.. وأكد أن مصر استقبلت 9 مليون ضيف خلال السنوات اللي فاتت.. وبالرغم من قلة الموارد والإمكانات لكننا بنتشارك في الموجود.

دا طبعًا غير زيادة عدد المواطنين في مصر 6 مليون خلال الـ 3 سنين اللي فاتت.. واللي بيمثل حمل كبير على قدرة الدولة.