«يعني اسيب الناس تنام في الصفيح.. أنا ربنا هايحاسبني».. كلمات مؤثرة من الرئيس السيسي في المؤتمر الوطني للشباب
"أنا أمين معاكم وأمين عليكم واللى هيحاسبنى ربنا، حساب البشر سهل، لكن حساب رب البشر صعب، والله مطلع على كل الأمور".. عبارات مؤثرة أطلقها الرئيس عبدالفتاح السيسي، النهاردة خلال فعاليات المؤتمر الوطني للشباب المقام بمدينة برج العرب.
الرئيس السيسي، كان بيتكلم عن توفير الدولة آلاف من وحدات الإسكان زي منطقة "بشاير الخير" واللي استوعبت الكتير من المواطنين اللي كانوا ساكنين في مناطق عشوائية وخطرة... وعلشان كدا الرئيس قال «يعني اسيب الناس تنام في الصفيح والشوارع.. ولا يقعدوا في أماكن لائقة".
الرئيس كمان قال، إن في كتير من المشاريع اللي بنعملها، لو كانت اتعملت في أماكن جديدة خالص ماكنتش هاتكلفنا التكاليف دي كلها، بمعنى إن في مشاريع كانت محتاجة إزالة وبناء من جديد.. ودا طبعًا مكلف.
كلام الرئيس كان في اتجاه أن العمل في مصر محتاج عشرات السنين بدون كلل ولا ملل، لكن إحنا حتى الآن ماشيين كويس.
