صفقة الـ 50 مليار دولار.. ليه السعودية قررت دعم أردوغان دلوقتي؟

السياسة دايما ما بتعترفش الا بلغة المصالح وفى السياسة مفيش عدو دايم ولا صديق على طول الخط.. كل دولة بتحسب حساباتها وفقا لمصالحها واللي مش عاوز تتعامل معاه النهاردة ممكن بكره تدور على وسيط عشان تفتح معاه علاقات.. وتركيا اللى كانت قالبة العالم كله على السعودي بسبب قضية مقتل الصحفي السعودي جمال خاشقجي على أراضيها النهاردة فاتحة دراعاتها وبترحب بالمملكة بعد ما الأخيرة بدأت تضخ مليارات الدولارات في الاقتصاد التركي في وقت النظام التركي برئاسة رجب طيب أردوغان اللى لسه فايز بولاية رئاسية جديدة بيدور على أي دعم خارجي لانقاذه من الوضع الحرج اللى بتعيشه الليرة ومعاها الاقتصاد التركي بشكل عام.. فيا ترى ليه السعودية قررت دعم أردوغان دلوقتي؟ وايه حجم التمويل اللى هتضخوا المملكة في تركيا؟ وايه المشروعات اللى هتستثمر فيها؟
 

دعم سعودي

من سنة تقريبا الأمير محمد بن سلمان ولى عهد السعوية زار تركيا وتم استقباله استقبال رسمي كبير من الرئيس التركي أردوغان والزيارة دي كانت بعد شهرين بس من زيارة اردوغان لرياض ولقاؤه الملك سلمان بن عبدالعزيز خادم الحرمين الشريفين والزيارتين دول كانوا اعلان لبداية مرحلة جديدة من العلاقات بين السعودية وتركيا مرحلة مفيهاش أي كلام عن الماضي ولا على الخلافات الكبيرة اللى كانت بين النظامين السعودي والتركي ومن وقتها والسعودية بدأت ضخ مليارات الدولارات في عدد كبير من المشروعات في أنقرة وإسطنبول وكتير من المدن التركية مشروعات معظمها في مجال البترول واكتشاف وادراة حقول نفطية، وكمان بتتفق حاليا على مشروعات بالمليارات في المملكة هيتم تنفيذها مع الجانب التركي. 

أرامكو السعودية

وفى الـ 24 ساعة الأخيرة تم الإعلان عن تفاصيل لقاءات جمعت مسئولي شركة أرامكو السعودية وهي مصنفة باعتبارها واحدة من أكبر الشركات العالمية بعدد من المقاولين الأتراك لمناقشة مشاريع محتملة بقيمة 50 مليار دولار في المملكة، وده   بيشير بقوة إلى تحسن العلاقات بين السعودية وتركيا.

مشاريع البنية التحتية

ونقلت وكالة "بلومبرج" عن رئيس اتحاد المقاولين الأتراك، إردال إرين، تصريحات مهمة قال فيها إن أرامكو السعودية بتسعى لجلب أكبر عدد من المقاولين الأتراك في مشاريعها، وأكد أنها بتخطط لمشاريع بنى تحتية، ومصافي تكرير نفط، ومد خطوط أنابيب، ومجمعات إدارية، بقيمة إجمالية تصل إلى 50 مليار دولار.
ووفق التقرير اللي نشرته الوكالة ممثلي شركة النفط السعودية التقوا بمديرين تنفيذيين من حوالي 80 شركة مقاولات في ورش عمل بالعاصمة التركية أنقرة في نهاية شهر مايو ، بهدف تأهيلهم لتنفيذ مشاريع مخطط ليها حتى عام 2025.

اتحاد المقاولين الأتراك

واعتبر رئيس اتحاد المقاولين الأتراك المشاريع الجديدة اللي هتمنحها أرامكو ليهم بانها  هتكون "شريان حياة" للمقاولين الأتراك، اللى عانوا الكثير وتأثرت أعمالهم بسبب الحرب بين روسيا وأوكرانيا، وتراجع المشاريع المدعومة من الحكومة مؤخراً لا سيماً بعد الزلزال.
والناس كلها لاحظت في خطاب النصر اللى ألقاه بعد اعلان فوزه بولاية رئاسية جديدة ازاى أشاد بدعم السعودية ودول الخليج لتركيا و قال الرئيس التركي أن دول الخليج أرسلت حزم تمويل إلى تركيا، وده ساعد في تخفيف الأعباء عن كاهل البنك المركزي التركي والأسواق، وأعلن انه  هيجتمع مع قادة الدول الخليجية اللى ساعدتهم عشان يشكرها

التقارب بين الرياض وأنقرة

المؤكد ان الفترة الجاية هتشهد مزيد من التقارب بين الرياض وأنقرة والتعاون بين البلدين هيكون على العى مستوى خصوصا في المجالات الاقتصادية والاستثمارية وتركيا هتستفاد جدا من اللي هيحصل في وقت عملتها الليرة بتعيش أصعب ايامها.