الأربعاء 08 فبراير 2023
رئيس التحرير
عمرو عامر
المشرف العام
عبدالعظيم حشيش
أخبار

الأسباب الحقيقية لإلغاء بنكا الأهلى ومصر شهادات 25%

الأربعاء 25/يناير/2023 - 12:31 ص
بنكي الأهلي ومصر
بنكي الأهلي ومصر

 كل الناس بتسأل هو ليه البنك الأهلى وبنك مصر ومعاهم بنك القاهرة هيوقفوا اصدار شهادة ال 25% بسرعة كده؟ وهل هيتم طرح شهادات تانية قريبة من سعر الفايدة ده فى الفترة الجاية ؟ وايه علاقة وقف الشهادة بانتهاء أزمة الدولار وحل ازمة تكدس البضائع فى الموانيء؟ 
 

حصيلة شهادات الـ 25 في المئة


بعد ما وصلت حصيلة بيع شهادة ال 25% ما يقرب من 400 مليار جنيه أعلن بنك مصر والبنك الأهلى عن وقف بيع الشهادات دي فى نهاية الشهر الجاري والرقم ده تقريبا نص الرقم اللى حققته شهادة الـ 18% اللى تم طرحها فى شهر مارس اللى فات بعد تعويم الجنيه مع اندلاع الحرب الروسية الاوكرانية.. ورغم ان فيه ناس كتير كانت بتتوقع مد بيع شهادة ال 25% لحد شهر مارس الجاى موعد كسر الشهادات القديمة الا أن البنكين أعلنوا النهاردة بشكل رسمي وقف الشهادة  
قرار ايقاف بيع شهادة ال 25% سببه الساسي حل أزمة الدولار والقضاء على السوق السودا للعملة بعد التدفقات الدولارية اللى حصلت الايام اللى فاتت واللى منها حوالى مليار دولار دخلت احتياطات البنك المركزي من بيع أدوات دين حكومية للمستثمرين الأجانب. 
وشهادة ال 25% شهادة استثنائية تم طرحها فى ظرف استثنائي وكان الغرض منها التنازل عن الدولار وفعلا حجم التنازلات وصل أكتر من 3.5 مليار دولار وده رقم كبير جدا عمل وفرة فى العملة الصعبة وساعد على استقرار سوق الصرف الايام اللى فاتت .


طب الناس اللى بتسأل هل هيكون فيه بديل لشهادة ال 25% ولا لأ ؟ 
 

بص يا سيدي فيه اجتماع للجنة السياسات النقدية فى البنك المركزي يوم 22 فبراير وده أول اجتماع للجنة فى 2023 ومن المتوقع فى الاجتماع ده الاعلان عن طرح شهادات بديلة لشهادة ال 25% وممكن الشهادة الجديدة تكون بعائد 20% وده لأن معدل التضخم ارتفع لحوالى 21% ومتوقع البنوك تحاول تعوض العملاء عن فرق نسب التضخم دي.