الإثنين 16 نوفمبر 2026
رئيس التحرير
عمرو عامر
رئيس التحرير
عمرو عامر
أخبار

مفاجآت الدولار تربك حسابات السوق.. ليه المصانع بتخزن خامات تكفيها 3 شهور؟

الإثنين 16/نوفمبر/2026 - 02:00 ص
الدولار الأمريكي
الدولار الأمريكي

إزاي الدولار ممكن يطلع وينزل أكتر من مرة في السنة.. والشركات المصرية تفضل مش عارفة تسعّر منتجاتها على كام؟.. وليه بعض المصانع بتخزن خامات تكفيها 3 شهور خوفاً من ارتفاع الدولار؟.. وهل المستهلك هيدفع فاتورة التقلبات دي من جيبه ولا الشركات هتضطر تتحمل جزء من الخسائر؟

الحقيقة إن تحركات الدولار بقت تحدي كبير قدام الشركات المصرية.. فرغم إن العملة الأمريكية ارتفعت بنحو 12.4% مقابل الجنيه من بداية السنة.. إلا إنها شهدت موجات صعود وهبوط متتالية.. وصلت بيها لأكتر من 54 جنيه في أبريل.. وبعدها تراجعت لمستويات بين 50 و51 جنيه.. ثم صعدت تاني فوق 56 جنيه في نهاية أكتوبر قبل ما تنزل لأقل من 53.5 جنيه في 11 نوفمبر.

التقلبات دي خلت الشركات محتارة في تحديد أسعار البيع وتدبير احتياجاتها من الخامات المستوردة.

وبعض الشركات اللي عندها سيولة اتجهت لتكوين مخزون استراتيجي من مستلزمات الإنتاج تحسباً لأي ارتفاع جديد في الدولار.. وفي المقابل شركات تانية فضلت تشتري احتياجاتها وقت الحاجة عشان متجمدش فلوسها في المخازن وتتحمل تكاليف تخزين وتمويل إضافية.

وفي المصانع كمان اتجاه متزايد للاعتماد على المكونات المحلية لتقليل الاحتياج للعملة الأجنبية.. لكن الإنتاج المحلي لسه مش قادر يغطي كل احتياجات الصناعة.

والأهم إن الشركات مش قادرة تمرر كل الزيادات للمستهلك.. خصوصاً مع ضعف الطلب وتراجع القدرة الشرائية.. وده بيخلي بعض المصانع تتحمل جزء من ارتفاع التكلفة على حساب هامش أرباحها عشان تحافظ على المبيعات واستمرار التشغيل.

فمش كل ارتفاع في الدولار معناه زيادة فورية في الأسعار.. لكن استمرار التقلبات بيزود تكلفة الإنتاج وبيصعّب حسابات الشركات.. وفي النهاية معادلة الأسعار هتفضل مرتبطة بتكلفة الخامات وقدرة المواطن على الشراء وحجم المنافسة في السوق.