قفزة تاريخية في احتياطي مصر الأجنبي.. 57.5 مليار دولار لأول مرة
احتياطي مصر من العملات الأجنبية بيحقق رقم تاريخي جديد.. لأول مرة في تاريخ البلاد يوصل إلى 57.5 مليار دولار بنهاية أكتوبر 2026، في قفزة جديدة بتعكس زيادة الأرصدة الدولارية لدى البنك المركزي المصري.
لمشاهدة الفيديو من هنا
الأرقام المعلنة كشفت إن الاحتياطي ارتفع بنحو 152 مليون دولار خلال شهر واحد، مقارنة بنحو 57.35 مليار دولار في نهاية سبتمبر، لكن لو رجعنا لبداية السنة هنلاقي إن الزيادة أكبر بكتير، بحوالي 6 مليارات دولار منذ ديسمبر 2025.
واللافت إن الارتفاع ده حصل رغم خروج استثمارات أجنبية من أذون الخزانة المصرية خلال أكتوبر، وصلت قيمتها إلى نحو 3.5 مليار دولار، وده بيطرح تساؤل مهم: إزاي الاحتياطي قدر يحقق مستوى قياسي رغم خروج المبالغ دي؟
السر الأساسي كان في زيادة الأرصدة السائلة من العملات الأجنبية، اللي ارتفعت بحوالي 768 مليون دولار خلال أكتوبر، لتتجاوز 40 مليار دولار، وتسجل أعلى مستوى ليها منذ فبراير 2020.
وفي المقابل، قيمة الذهب المدرج ضمن الاحتياطي تراجعت بحوالي 613 مليون دولار، نتيجة انخفاض أسعاره عالميًا، لتسجل نحو 16.84 مليار دولار بنهاية أكتوبر.
أما مصادر تدفق الدولار، فمن أبرزها تحويلات المصريين بالخارج، اللي سجلت 33.9 مليار دولار خلال أول 8 شهور من 2026، بالإضافة إلى إيرادات قناة السويس اللي ارتفعت بنسبة 94% خلال أكتوبر لتصل إلى 724 مليون دولار.
كمان الاحتياطي بيوفر للبنك المركزي قدرة أكبر على تدبير احتياجات البلاد من النقد الأجنبي، وتمويل الواردات، والوفاء بالالتزامات الخارجية، ومواجهة التقلبات المفاجئة في الأسواق العالمية.
والرقم القياسي الجديد بييجي في وقت بتستهدف فيه مصر تعزيز مواردها من العملة الصعبة، وتقوية قدرتها على مواجهة الضغوط الاقتصادية الخارجية.
وبكده احتياطي مصر الأجنبي بيكسر حاجز 57 مليار دولار لأول مرة، ويسجل 57.5 مليار دولار.. فهل تواصل الاحتياطيات ارتفاعها خلال الشهور المقبلة؟
