الدولار يتلقى ضربة جديدة في مصر.. جنيه وربع تراجع في 4 أيام والسبب مفاجأة

الدولار كان لسه من أيام معدي الـ56 جنيه.. إيه اللي حصل وخلاه يخسر 1.25 جنيه في 4 أيام بس؟ وهل رجوع المستثمرين الأجانب لمصر هو كلمة السر في إنقاذ الجنيه؟ وهل التراجع ده ممكن يستمر ولا الدولار بيستعد لجولة جديدة من الارتفاع؟

اللي حصل إن سوق الصرف المصري شهد تحول ملحوظ خلال الأيام الأخيرة.. الدولار فقد حوالي 2.2% من قيمته قدام الجنيه.. وسجل أقل مستوى ليه في أسبوعين.. ووصل في البنك الأهلي المصري إلى 54.74 جنيه للشراء و54.84 جنيه للبيع.

لكن عشان نفهم سبب التراجع لازم نرجع لشهر أكتوبر.. وقتها الدولار قفز بحوالي 7.3% ووصل لمستويات تجاوزت 56 جنيه.. بسبب خروج جزء من استثمارات الأجانب في أذون الخزانة المصرية.. بالتزامن مع تصاعد التوترات بين أمريكا وإيران.

والأرقام بتكشف حجم الضغوط اللي تعرض لها الجنيه.. فبحسب بيانات البورصة المصرية خرجت استثمارات أجنبية بحوالي 3.5 مليار دولار من أذون الخزانة خلال أكتوبر.. ونصف المبلغ تقريبا خرج في الأسبوع الأخير من الشهر.

لكن المشهد اتغير خلال الأيام الأخيرة.. إذ عادت استثمارات الأجانب للسوق المصري وزادت مشترياتهم من أذون الخزانة الحكومية.. وده ساعد على دخول عملة صعبة جديدة للسوق وزيادة المعروض من الدولار وتقليل الضغط على الجنيه.

وهنا لازم نفهم إن الدولار في مصر بيتحرك وفقا للعرض والطلب.. يعني لما موارد الدولة من العملة الأجنبية تزيد بيكون فيه دعم للجنيه.. ولما التدفقات تتراجع الضغوط على الدولار بتزيد.

وده نفس المبدأ اللي أكد عليه محافظ البنك المركزي حسن عبد الله.. واللي اعتبر إن مرونة سعر الصرف بتعزز ثقة المستثمرين في السوق المصري.