مليون جنيه للحضانة بفائدة 5%.. بنك ناصر يعلن تفاصيل تمويل جديد لأصحاب المشروعات

لو نفسك تفتح حضانة أو عندك حضانة وعاوز تطورها، بنك ناصر عنده خبر مهم ليك.

البنك أعلن عن برنامج «تمويل حضانتي»، وده مخصص لأصحاب الحضانات القائمة، وكمان اللي عاوزين يبدأوا مشروع جديد للأطفال أقل من 4 سنين.

التمويل ممكن يوصل لحد مليون جنيه للمشروع الواحد، وبعائد سنوي 5% بس، وفترة السداد من سنة لحد 4 سنين، وكمان فيه فترة سماح بتوصل لـ 3 شهور.

والتقديم ليه شروط، أهمها أن سن العميل يكون من 21 لـ65 سنة وقت نهاية السداد، مع تقديم بطاقة الرقم القومي، وإثبات مقر الحضانة، والمؤهل، والترخيص أو ما يثبت بدء إجراءاته.

كمان البنك بيطلب دراسة جدوى للمشروع، والضمانات ممكن تشمل ضامن شخصي أو تحويل مرتب أو معاش، بالإضافة لإمكانية تقديم شهادات أو أوعية ادخارية كضمان.

والهدف مش بس تمويل مشروع، لكن كمان تطوير الحضانات، وتقنين أوضاعها، وتوفير فرص عمل جديدة.