بدل الإعلانات حلوا مشاكلنا.. شكاوى عملاء حالا تتصاعد

بطاقة مش شغالة، فلوس متأخرة، ورسوم العملاء مش فاهمينها.. شكاوى عملاء حالا بتفتح سؤال مهم: العميل لما يواجه مشكلة، مين هيرد عليه؟

عدد من المستخدمين اشتكوا من تعطل بطاقات، وتأخر تفعيل حسابات، ومشاكل في تحويل واستقبال الفلوس، بالإضافة لصعوبات في التواصل مع خدمة العملاء.

وفي شكاوى تانية، عملاء بيتكلموا عن مشاكل في التحويلات بين تطبيق «حالا» وبعض المحافظ الإلكترونية، وعمليات اتأخرت لفترات طويلة.
وفي ملف تاني عليه علامات استفهام: الرسوم وتكلفة التمويل.

بعض العملاء بيقولوا إن التكلفة النهائية للتمويل كانت أعلى بشكل كبير من السعر النقدي، وإن بعض الرسوم أو تفاصيل العروض ما كانتش واضحة بالنسبة لهم قبل التعاقد.

وفي واقعة متداولة، عميل قال إنه سدد التزاماته بالكامل، واللي ذكر إنها وصلت لحوالي 42 ألف جنيه، لكنه فوجئ بعد كده بمطالبة بغرامات قال إنها تجاوزت 160 ألف جنيه، وطالب بتفسير واضح للحسبة.

وفي واقعة تانية، عميل قال إنه حصل على عرض من فرع للشركة بمعاملة بدون فوائد لمدة 6 شهور، لكنه فوجئ -بحسب روايته- بإضافة فوائد تجاوزت 25.%
كل دي شكاوى وروايات منسوبة لأصحابها، ومش معناها لوحدها إن فيه مخالفة، وكل حالة محتاجة مراجعة مستنداتها ورد الشركة والجهات المختصة.

لكن السؤال الأهم: هل حالا هتقدر ترد على كل الشكاوى دي وتوضح للعملاء الرسوم وآليات التحويل والتحصيل؟
العميل مش عايز إعلان حلو، العميل عايز فلوسه تتحول، وبطاقته تشتغل، وحسابه يبقى واضح.. ولما يشتكي يلاقي حد يرد عليه.