ريمونتادا مفاجئة للدولار.. ضربة جديدة بسبب الأموال الساخنة
هو ليه الدولار رجع يزيد تاني بعد ايام من تحقيقه خسائر كبيرة؟ وايه علاقة اللى بيحصل فى سوق صرف العملات الأجنبية بتخارج الأموال الساخنة من مصر؟ وايه تاثير ده على اداء الجنيه الفترة الجاية؟
اللي حصل النهارده إن الدولار أنهى سلسلة الخسائر اللي كان محققها خلال الأيام اللي فاتت ورجع يسجل ارتفاع جديد في البنوك المصرية وده خلى ناس كتير تسأل هو إيه اللي اتغير في ساعات قليلة وهل السوق دخل مرحلة جديدة ولا دي مجرد حركة طبيعية بتحصل في أي سوق صرف بيعتمد على العرض والطلب والإجابة إن السبب الرئيسي اللي ظهر مع الارتفاع الأخير هو تخارج جزء من الأموال الساخنة من أدوات الدين المصرية وده كان كفاية إنه يغير اتجاه الدولار بعد أيام من التراجع.
طيب يعني إيه أصلا الأموال الساخنة وليه كل ما تدخل أو تخرج بنسمع إن الدولار بيتحرك؟
الأموال الساخنة ببساطة هي استثمارات أجنبية بتدخل سوق أذون وسندات الخزانة علشان تحقق عائد مرتفع ولما المستثمر الأجنبي يلاقي فرصة أحسن أو يحس إن فيه مخاطر أكبر يبدأ يخرج بسرعة وياخد فلوسه بالدولار وده بيزود الطلب على العملة الأميركية وبالتالي ممكن يدفع سعرها للارتفاع حتى لو الزيادة كانت محدودة.
وده اللي انعكس على أسعار الصرف النهارده لأن الدولار سجل أعلى سعر في بنك الإمارات دبي الوطني عند 50.40 جنيه للشراء و50.50 جنيه للبيع بينما أقل سعر كان في بنك التنمية الصناعية عند 50.07 جنيه للشراء و50.17 جنيه للبيع أما في البنك المركزي المصري فسجل الدولار 50.17 جنيه للشراء و50.30 جنيه للبيع والأرقام دي بتوضح إن الزيادة موجودة لكنها ما زالت محدودة ومفيش قفزات كبيرة في السوق.
طب هل الارتفاع ده معناه إن الجنيه بدأ يخسر قوته؟
الحكم لسه بدري لأن حركة الدولار اليومية بتتأثر بعوامل كتير مش عامل واحد بس صحيح إن خروج جزء من الأموال الساخنة ضغط على الجنيه لكن في المقابل فيه مصادر تانية للعملة الأجنبية بتدعم السوق زي تحويلات المصريين بالخارج وإيرادات السياحة والصادرات والاحتياطي النقدي وكل دي عوامل بتخفف من أي ضغوط ممكن تحصل بسبب خروج استثمارات أجنبية.
طيب هل المواطن العادي يقلق من الزيادة الأخيرة في سعر الدولار؟
الحقيقة إن التحركات الحالية لسه في نطاق محدود جدا ومفيش مؤشرات على قفزات حادة في سعر الصرف لأن الفارق بين أعلى وأقل سعر في البنوك ما زال بسيط وده معناه إن السوق لسه بيتحرك بشكل منظم ومفيش حالة ذعر أو نقص كبير في العملة الأجنبية.
