أجهزة كهربائية وتكييفات بأسعار أقل من السوق.. اعرف إزاي تشارك في مزاد المالية

لو بتجهز بيتك أو بتدور على تكييف أو أجهزة كهربائية بسعر أقل من السوق.. يبقى الخبر ده يهمك.

وزارة المالية أعلنت عن مزاد علني جديد لبيع مجموعة كبيرة من البضائع التابعة لجهات حكومية، وبتضم أجهزة كهربائية، وتكييفات، وأثاث، وأجهزة كمبيوتر، وقطع غيار سيارات، ومعدات وأصناف تانية كتير، وكلها بتتباع من خلال مزاد رسمي.

ولو حابب تشارك، فيه كام شرط لازم تعرفهم.

أول حاجة، لازم تشتري كراسة الشروط، وسعرها 400 جنيه، وبعدها تسدد تأمين دخول المزاد بقيمة 50 ألف جنيه، واللي بيكون شرط أساسي للمشاركة.

ولو رسى عليك المزاد، هتدفع 30% من قيمة الصفقة فورًا، وباقي المبلغ خلال 15 يومًا، مع العلم إن البيع بيتم من غير عمولة، والمعاينة قبل الشراء هي الأساس.

المزاد بيتعمل من خلال الهيئة العامة للخدمات الحكومية، وبيكون فرصة للأفراد والشركات يشتروا احتياجاتهم بأسعار غالبًا أقل من أسعار السوق، لكن قبل ما تزايد.. عاين البضاعة بنفسك، واقرأ كراسة الشروط كويس، علشان تعرف كل التفاصيل قبل الشراء.