أزمة فوري في مصر.. خصومات غامضة بدون OTP: فلوس الناس راحت فين؟

تفتح موبايلك تلاقي فلوسك ناقصة… من غير ما تدفع ولا تعمل أي حاجة.. إيه اللي بيحصل في فوري؟! خلال الأيام اللي فاتت، ناس كتير في مصر اشتكت من حاجة غريبة جدًا في تطبيق فوري.

فلوس بتتخصم من الحساب فجأة، من غير أي عملية دفع، ومن غير حتى رسالة تأكيد! المستخدمين قالوا إنهم صحّوا لقوا رصيدهم ناقص.  ولما راجعوا العمليات، لقوا خصومات مش مفهومة!

الأغرب؟ مفيش كود تحقق “OTP” وصلهم! وده اللي خلا الموضوع يخوف ناس كتير؛ لأن ده معناه إن فيه حاجة مش طبيعية بتحصل.

القصة انتشرت بسرعة على فيسبوك.. بوستات وشكاوى من كل حتة، وكل واحد بيحكي تجربته مع الخصومات الغامضة دي. والقلق زاد أكتر مع تكرار نفس المشكلة مع أكتر من شخص.

ناس حاولت تكلم خدمة العملاء… بس في شكاوى من بطء الرد أو عدم وجود إجابات واضحة، وده زوّد الإحساس بعدم الأمان عند المستخدمين. لحد دلوقتي، مفيش بيان رسمي واضح يشرح إيه اللي حصل بالظبط، ولا إيه الإجراءات اللي اتاخدت لحماية الحسابات.