غيرت قطعة في عربيتك؟ 5 خطوات لازم تعملهم علشان تتجنب الغرامة
كتير من أصحاب العربيات لما يحصل عطل كبير بيضطروا يغيروا قطعة مهمة في العربية.. زي الموتور أو الشاسيه أو أي جزء أساسي.
لكن اللي ناس كتير متعرفوش إن تغيير بعض أجزاء العربية لازم يتم بشروط معينة وإلا ممكن تتعرض لمخالفة أو مشكلة قانونية.. علشان كده إدارة المرور حددت 5 خطوات مهمة لازم تتعمل قبل ما تغير أي جزء أساسي في عربيتك.
أول خطوة لازم تبلغ قسم المرور المختص قبل ما تبدأ تغيير القطعة، علشان يتم فحص العربية.
تاني خطوة لو غيرت جزء أساسي لازم تقدم مستند يثبت ملكيتك للقطعة الجديدة، سواء فاتورة من المصنع لو كانت جديدة، أو شهادة إفراج جمركي لو كانت مستوردة.
ثالث خطوة لو القطعة مستعملة، لازم توضح جت من عربية إيه، وتقدم شهادة من المرور اللي كانت العربية دي مرخصة فيه.
رابع خطوة لازم يتم تسجيل رقم القطعة الجديدة في تقرير الفحص الفني، ولو القطعة مفيهاش رقم يتم دمغها برقم رسمي من المرور.
خامس وأهم خطوة التأكد من مطابقة الرقم في كل فحص فني بعد كده، علشان تتأكد إن كل حاجة قانونية ومفيهاش مشاكل.
يعني باختصار تغيير قطع العربية مش مجرد تصليح وخلاص، لكن لازم يتم بطريقة قانونية علشان تتجنب أي مخالفات أو غرامات.
