ليلة صعبة في الصاغة.. الدهب يسجل مستويات تاريخية محصلتش قبل كده
هو ايه اللي بيحصل في سوق الدهب؟ وليه الاسعار بتطلع بالشكل الجنوني ده؟ وهل اللي احنا شايفينه ده طبيعي ولا فقاعة وهتنفجر ولا الدهب داخل على موجة صعود جديدة ومفيش رجوع للاسعار القديمة؟ وهل المواطن العادي لسه قدامه فرصة يفهم السوق ولا اللي بيحصل اكبر من اي حسابات تقليدية؟
الدهب النهارده بقى حديث الشارع والمستثمرين وكل بيت مصري لان اللي حاصل مش حركة عادية ولا ارتفاع تقليدي ده صعود تاريخي بيكسر ارقام عمرها ما اتكسرت قبل كده وده واضح من القفزة الكبيرة اللي حصلت في الاسعار سواء محليا او عالميا خلال تعاملات النهارده.
في السوق المصري الدهب طلع حوالي 150 جنيه مرة واحدة وعيار 21 اللي هو العيار الشعبي والاساسي وصل لمستوى 6525 جنيه وده رقم غير مسبوق تماما واللي متابع السوق عارف ان المستويات دي كانت بتتحلم بس من شهور قليلة.
مش بس كده ده كمان عيار 24 سجل حوالي 7460 جنيه وعيار 18 وصل لحوالي 5571 جنيه والجنيه الدهب طلع هو كمان وسجل حوالي 54855 جنيه وده بيعكس حالة التسعير المرتبكة اللي السوق بيمر بيها.
عالميا الصورة اكتر سخونة لان الاونصة كسرت كل الحواجز التاريخية وعدت مستوى 4800 دولار لاول مرة في التاريخ وده رقم كبير جدا بيعكس حالة قلق عالمية مش بس حركة مضاربات.
السبب الرئيسي في اللي بيحصل هو تصاعد التوترات الجيوسياسية عالميا وتجدد الصراعات التجارية والاقتصادية بين قوى كبرى زي الولايات المتحدة والاتحاد الاوروبي وده دايما بيخلي المستثمرين يهربوا من الاصول الخطرة ويدوروا على الملاذ الامن والملاذ الاول دايما بيبقى الدهب.
الدهب من بداية السنة طالع في مصر بحوالي 12 في المية وعالميا الاونصة زادت بحوالي 11.5 في المية وده رقم كبير جدا في فترة قصيرة وبيفوق مكاسب يناير اللي فات لوحده.
كمان حالة عدم اليقين مسيطرة على مزاج المستثمرين في العالم كله مفيش وضوح في السياسات النقدية مفيش استقرار في العلاقات التجارية وكل ده بيخلي الدهب خيار دفاعي مش استثماري بس.
طيب هل ممكن يحصل تصحيح في الاسعار الاجابة ان التصحيح دايما وارد في اي سوق لكن السؤال الحقيقي هو هيبقى تصحيح قد ايه وهل هيكسر الاتجاه العام ولا مجرد تهدئة مؤقتة لان طالما اسباب الصعود موجودة التوترات قائمة والمخاطر العالمية مستمرة فصعب جدا نشوف هبوط حاد ومستدام.
اللي بيحصل دلوقتي بيأكد ان الدهب مش بس وسيلة ادخار لكنه كمان اداة تحوط في عالم مليان قلق وعدم استقرار واللي داخل السوق لازم يكون فاهم ان الحركة مش خط مستقيم وفيه تذبذبات لكن الاتجاه العام لسه صاعد طالما المشهد العالمي بالشكل ده.
وبالتالي اللي بيحصل في سوق الدهب مش جنون بدون سبب لكنه انعكاس مباشر لعالم مضطرب واقتصاد عالمي بيدور على الامان قبل اي عائد وده بيخلي الدهب دايما في قلب الصورة مهما اتغيرت الظروف.
