التنفيذ الأحد.. تسهيلات جديدة لمتضرري الإيجار القديم

شريحة كبيرة جدا من الناس مهتمة تعرف ايه الجديد في قانون الايجار القديم خصوصا موضوع السكن البديل

والدولة اعلنت خطوة مهمة لتسهيل الاجراءات على المتضررين.. وهي ان البريد المصري قرر يفتح باب التسجيل اون لاين لمتضرري الايجار القديم وده هيبدأ من يوم الاحد 18 يناير.

التسجيل هيكون متاح من خلال اكتر من 500 مكتب بريد موزعين على كل محافظات الجمهورية علشان الخدمة توصل لكل الناس من غير زحمة ولا تعب.

البريد وضح ان التقديم في المرحلة الاولى هيكون مخصص بس للمواطنين اللي عندهم حساب مفعل على منصة مصر الرقمية.

السبب ان البيانات هتتراجع الكترونيا من خلال المنصة وده هيخلي الاجراءات اسرع وادق ومن غير اخطاء.

ولو حد معندوش حساب على مصر الرقمية دلوقتي فالبريد قال ان خدمة انشاء وتفعيل الحساب هتكون متاحة بعد كده من خلال مكاتب البريد نفسها.

كمان من ضمن التسهيلات الجديدة ان مكاتب البريد اللي بتقدم الخدمة هتشتغل فترة مسائية لحد الساعة 6 مساء.

ده علشان يدي فرصة اكبر للناس اللي مش بتلحق الصبح او عندها شغل.

المهم قبل ما تروح مكتب البريد تتأكد ان حسابك على منصة مصر الرقمية متفعل وجاهز.. علشان تخلص الاجراءات بسرعة ومن غير تعطيل.