الجنيه يقلب الطاولة ويسجل أعلى مستوى أمام الدولار منذ تعويم مارس 2024
في الأيام الأخيرة الجنيه، بيواصل تسجيل المزيد من المكاسب مقابل الدولار ليسجل أعلى مستوى من وقت تعويم مارس 2024 وده بعد الزيادات الكبيرة اللي بتعلنها الحكومة المصرية في السيولة الدولارية.. فيا ترى الجنيه المصري رايح على فين.. وهل اللي بيحصل ده طبيعي ولا احنا قدام مشهد جديد محدش كان متوقعه؟ .. وازاي العملة المحلية توصل لأعلى مستوى ليها قدام الدولار من وقت تعويم مارس 2024؟ وايه حكاية السيولة الدولارية اللي الحكومة بتتكلم عنها.. وليه السوق كله بدأ يحسبها بشكل مختلف؟
اللي حاصل النهارده ان الجنيه المصري بيسجل مكاسب واضحة وقدر يثبت نفسه عند مستويات قوية قدام الدولار وده انعكاس مباشر لتحركات كبيرة بتحصل في السيولة الدولارية جوه السوق المصري ومع كل إعلان جديد عن دخول عملة صعبة أو زيادة الاحتياطي الصورة بتبقى أوضح ان في مسار مختلف بيتشكل بهدوء ومن غير ضجيج.
أسعار الدولار في البنوك بتتحرك في نطاق ضيق ومستقر وده في حد ذاته رسالة مهمة لان الاستقرار دايما بيبقى أقوى من الصعود السريع الجنيه بقى بيتداول حوالين مستويات أقل من 47 ونص وده أعلى أداء ليه من وقت التعويم الأخير وده معناه ان السوق شايف ان في وفرة حقيقية مش مؤقتة.
القصة مش سعر شاشة وبس القصة سيولة حقيقية راجعة للجهاز المصرفي تحويلات مصريين بالخارج بتدخل بأرقام قياسية دولارات بتدخل من سياحة ومن استثمارات ومن صفقات كبيرة الدولة أعلنت عنها خلال الفترة اللي فاتت وكل ده بيعمل ضغط عكسي على الدولار بدل ما كان ضاغط على الجنيه.
الجنيه وهو بيقفل 2025 كان طالع بنسبة محترمة قدام الدولار وده ما حصلش من فراغ ده حصل بعد ما السوق بدأ يصدق ان الدولة مش في دايرة خفض عملة مستمرة وان في مرحلة جديدة عنوانها إدارة موارد مش سد فجوات بس المرحلة دي بتعتمد على ان الدولار يبقى موجود ومتداول ومتاح مش محجوز ولا مخزن.
الاحتياطي النقدي الأجنبي وصل لمستويات تاريخية وتخطى 51 مليار دولار وده رقم بيدي ثقة كبيرة لان الاحتياطي مش رقم صامت ده شبكة أمان لأي اقتصاد ووقت الأزمات هو اللي بيحمي سعر الصرف ويخلي البنك المركزي قادر يتحرك بهدوء ومن غير توتر.
كمان الذهب لعب دور مهم جدا جوه الاحتياطي وزيادته الكبيرة عوضت أي تراجع حصل في بعض العملات وده معناه ان إدارة الاحتياطي بقت أكثر مرونة وأذكى في توزيع المخاطر وده انعكس بشكل مباشر على ثقة السوق في الجنيه.
اللي بيحصل دلوقتي اننا بنشوف انتقال تدريجي من مرحلة الدفاع لمرحلة البناء من مرحلة مطاردة الدولار لمرحلة تنظيم السوق وده فرق كبير لان الجنيه لما يبقى مدعوم بتدفقات حقيقية مش قرارات مؤقتة بيقدر يصمد.
السؤال المهم هنا هل الجنيه هيكمل؟ الإجابة مرتبطة باستمرار نفس السياسة واستمرار دخول الدولار بنفس الوتيرة لو ده حصل فالسوق هيشوف مزيد من الاستقرار ويمكن تحسن كمان لان الطلب هيبقى أقل والوفرة هتفضل موجودة.
الجنيه النهارده مش بس رقم قدام الدولار الجنيه بقى تعبير عن حالة اقتصادية مختلفة شوية عن اللي اتعودنا عليها خلال السنين اللي فاتت حالة فيها هدوء وثقة وإدارة موارد وده اللي مخلي الصورة تميل للإيجابي مع دخول 2026.
اللي واضح ان السوق بدأ يتعامل مع الجنيه على انه عملة قابلة للاستقرار مش مجرد ضحية للضغوط ودي نقطة تحول مهمة جدا في المشهد الاقتصادي المصري كله.
