نهاية كابوس البحر الأحمر وبدء موسم الدولارات.. تطورات مهمة لقناة السويس
قناة السويس بتستعد انها تشتغل بالقوة التشغيلية القصوى بعد شهور طويلة من الركود ؟ فيا ترى هل عودة سفن الشحن للممر الملاحي الاهم في العالم معناها ان ازمة البحر الاحمر بتفك؟ وهل ده هيغير فعلا خريطة دخول العملة الاجنبية لمصر ويرجع الدولارات اللي غابت الفترة اللي فاتت؟
القصة بدأت لما شركة الشحن الدنماركية العملاقة ميرسك اعلنت ان واحدة من سفنها عدت فعلا البحر الاحمر ومضيق باب المندب ووصلت عبر قناة السويس لاول مرة من قرابة عامين وده في حد ذاته تطور مهم جدا لان ميرسك كانت من اوائل الشركات اللي غيرت مسار سفنها من نهاية 2023 بسبب التوترات الامنية وفضلت طريق راس الرجاء الصالح رغم تكلفته العالية وطول مدته.
ميرسك قالت بوضوح ان الخطوة دي مش معناها عودة كاملة وفورية لكن هي بداية اختبار وعودة تدريجية مدروسة يعني الشركة بتقيس المخاطر وبتحسب كل خطوة وده نفس اللي بتعمله شركات شحن عالمية كتير لان قناة السويس بالنسبة لهم مش مجرد طريق اقصر دي شريان اساسي للتجارة العالمية بين الشرق والغرب.
عودة الملاحة حتى بشكل جزئي معناها حاجة واحدة مهمة جدا لمصر وهي رجوع تدفقات العملة الاجنبية من واحد من اهم مصادرها قناة السويس كانت بتدخل مليارات الدولارات سنويا ومع تحويل السفن لطريق راس الرجاء الصالح الايرادات تراجعت بشكل واضح وده اثر على ميزان النقد الاجنبي وعلى موارد الدولة.
دلوقتي اي سفينة بترجع حتى لو واحدة بتدي اشارة ثقة وبتفتح الباب قدام غيرها لان شركات الشحن بترقب بعضها واول ما شركة بحجم ميرسك تبدأ خطوة الباقي بيحسبها من جديد وده اللي باين فعلا مع اعلان شركة فرنسية كبيرة انها ناوية تستخدم القناة في رحلاتها بين الهند وامريكا بداية من يناير الجاي.
التأثير مش هيكون لحظي ولا مفاجئ لكنه تراكمي يعني كل اسبوع تمر فيه سفن اكتر الايرادات تزيد الدولارات تدخل الضغط على سوق الصرف يقل والبنك المركزي يلاقي مساحة اوسع للحركة وده ينعكس في الاخر على استقرار الجنيه وتحسن مؤشرات الاقتصاد الكلي.
كمان عودة الملاحة بتنعش المنطقة الاقتصادية لقناة السويس لان حركة السفن معناها خدمات تموين صيانة لوجستيات وكل ده بيخلق نشاط اقتصادي مباشر وغير مباشر وفرص عمل وتدفقات نقدية مش بس رسوم عبور.
الاهم ان اللي بيحصل دلوقتي بيدي رسالة ان قناة السويس لسه هي الخيار الافضل والاقصر والاوفر عالميا وان اي ظروف استثنائية مهما طالت ما تلغيش الحقيقة دي ومع تحسن الاوضاع الامنية وتنسيق دولي اكبر العودة الكاملة مسالة وقت مش اكتر.
ومع كل سفينة بتعدي الثقة بتزيد والدولار بيرجع والاقتصاد بياخد نفسه شوية وده بالظبط اللي مصر محتاجاه في المرحلة الحالية موارد مستدامة من غير ديون ومن غير ضغوط اضافية وقناة السويس تفضل زي ما كانت دايما رئة الاقتصاد المصري ومصدر قوة حقيقي للعملة الاجنبية.
