قطر داخلة مصر بتقلها.. استثمارات بمليارات الدولارات في قطاعات حيوية
ليه قطر بتتحرك بقوة ناحية السوق المصري؟ وايه سر الاندفاع القطري للاستثمار في مصر في التوقيت ده؟ وايه حكاية الوفد القطري اللى بيزور القاهرة اليومين دول؟
الايام اللي فاتت القاهرة استقبلت وفد قطري كبير بيضم اكتر من عشرين شركة من مختلف القطاعات وده وفد مش عادي لان اللي بيقوده وزير التجارة الخارجية القطري بنفسه ومعاه ممثلين عن غرفة تجارة وصناعة قطر وشركات شغالة في مجالات متنوعة وده بيكشف ان التحرك مدروس ومخطط له ومش خطوة عابرة.
التحرك القطري جه في توقيت حساس ومهم بالنسبة للاقتصاد المصري والاقليمي كمان لان مصر دلوقتي بتمر بمرحلة اعادة تموضع اقتصادي وفتح واسع لباب الشراكات والاستثمارات الاجنبية وقطر شايفة ان الفرصة موجودة وان السوق المصري بقى اكثر جاذبية من فترات سابقة.
واحد من اهم اسباب الاهتمام القطري هو حجم السوق المصري نفسه سوق كبير طلبه متنوع وقادر يستوعب استثمارات طويلة الاجل وده دايما عنصر جذب لاي مستثمر بيدور على استقرار وفرص نمو حقيقية وكمان مصر بقى عندها بنية تشريعية واستثمارية اكثر مرونة من قبل.
الوفد القطري مش جاي يتفرج ولا يستطلع وبس لكن جاي داخل على شراكات فعلية وده باين من تنظيم منتدى اعمال مصري قطري بمشاركة شركات مصرية كتير وعقد لقاءات ثنائية مباشرة بين رجال الاعمال ودي اهم مرحلة في اي تحرك استثماري لانها بتنقل الكلام من مستوى الرغبة لمستوى التنفيذ.
الاهتمام القطري بالسوق المصري زاد اكتر بعد توقيع اكبر صفقة استثمارية قطرية في تاريخ العلاقات بين البلدين واللي تخص تطوير منطقة علم الروم باستثمارات ضخمة ودي صفقة بعثت رسالة واضحة ان قطر شايفة مصر سوق استراتيجي طويل الاجل مش مشروع مؤقت.
كمان لازم ناخد بالنا ان التحرك ده مش من طرف واحد مصر نفسها اشتغلت على فتح قنوات مباشرة مع المستثمرين القطريين ونظمت زيارات رسمية وقدمت خريطة واضحة بالفرص الاستثمارية المتاحة وركزت على قطاعات محددة قطر مهتمة بيها بالفعل.
من ابرز المجالات اللي الشركات القطرية ناوية تركز عليها هو القطاع الصناعي وخصوصا الصناعات الكيماوية والبتروكيماويات وده قطاع قطر عندها فيه خبرة كبيرة وتقدر تضيف فيه قيمة حقيقية وكمان صناعة السيارات والتصنيع الغذائي والبنية التحتية والزراعة والرعاية الصحية.
فيه كمان اهتمام واضح بقطاع التعدين وده ظهر من خلال رغبة شركة قطر للتعدين في الاستثمار في الذهب والنحاس ودي معادن مصر بتملك احتياطيات واعدة منها وبتسعى تستغلها بشكل افضل خلال المرحلة الجاية.
الهيدروجين الاخضر كمان داخل بقوة على اجندة التعاون وده ملف استراتيجي لمصر وقطر لان الاتنين بيدوروا على مستقبل الطاقة النظيفة والتوسع في مشروعات مستدامة تخدم الاسواق العالمية في المرحلة الجاية.
الارقام بتأكد ان العلاقات الاقتصادية بين البلدين ماشية في اتجاه تصاعدي الاستثمارات القطرية في مصر زادت والاستثمارات المصرية في قطر كمان تضاعفت تقريبا والتبادل التجاري سجل نمو كبير وده معناه ان فيه ثقة متبادلة وقاعدة شراكة بتتوسع.
قطر بتدور على فرص مستقرة وعوائد طويلة الاجل ومصر بتوفر ده من خلال سوق كبير ومشروعات قومية وبنية اساسية متطورة وسياسات بتشجع المستثمر الاجنبي وبتقلل المخاطر.
اللي حاصل دلوقتي مش مجرد اهتمام مؤقت لكن ملامح شراكة اقتصادية اعمق بتتكون واحدة خطوة خطوة ومع استمرار اللقاءات وتبادل البيانات عن الفرص الاستثمارية الصورة هتتضح اكتر.
والواضح ان قطر داخلة على السوق المصري بعقلية الشريك مش المستثمر العابر وده بالظبط النوع اللي الاقتصاد المصري محتاجه في المرحلة دي شراكات حقيقية تضيف قيمة وتخلق فرص عمل وتدعم النمو على المدى الطويل.
