فاتورة الكهرباء هتقل؟.. مصر تبدأ تطبيق السعر المخفض للعدادات الكودية رسميًا

فاتورة الكهرباء هتقل 30%.. لكن مش لكل الناس! مصر بدأت رسميًا تطبيق السعر المخفض للعدادات الكودية، وفيه فئة محددة هي اللي هتستفيد من القرار.

شركات توزيع الكهرباء التسع بدأت تطبيق التخفيض، لينزل سعر الكيلووات ساعة من 2.74 جنيه إلى حوالي 1.91 جنيه، يعني توفير يقارب 83 قرش في كل كيلووات ساعة.

لكن مين المستفيد؟

القرار بيستهدف أصحاب العدادات الكودية اللي اتركبت قبل عام 2024، واللي لسه مستكملوش إجراءات التصالح وتقنين أوضاع العقارات، وفقًا للضوابط المنظمة.

والحكومة منحت الفئة دي مهلة 6 شهور لتوفيق أوضاعها، مع الاستفادة من التخفيض خلال فترة المهلة.

يعني لو استهلاكك 300 كيلووات ساعة، ففرق السعر وحده ممكن يوفرلك حوالي 249 جنيه، مقارنة بالسعر السابق، بافتراض تطبيق السعرين على كامل الاستهلاك.

لكن خلي بالك.. مش كل أصحاب العدادات الكودية مشمولين بالتخفيض، والاستفادة مرتبطة بتاريخ تركيب العداد وشروط القرار.

والسؤال الأهم: هل التخفيض هيكون كفاية لتخفيف عبء الكهرباء، وفي نفس الوقت يشجع المواطنين على إنهاء إجراءات التصالح قبل انتهاء المهلة؟