مترو شبرا الخيمة يتمدد.. 3 محطات جديدة لحد الدائري وقليوب
من شبرا الخيمة للدائري.. 3 محطات مترو جديدة ممكن تغيّر خريطة المواصلات في شمال القاهرة، والخطة كمان بتفتح الباب لوصول المترو لحد مدينة قليوب.
الهيئة القومية للأنفاق بتدرس مد الخط التاني للمترو بعد محطة شبرا الخيمة لمسافة 3.2 كيلومتر، من خلال 3 محطات جديدة هي بيجام وميت نما والطريق الدائري.
لكن أهمية المشروع مش في المحطات الجديدة بس.. المحطة اللي هتكون عند الطريق الدائري مستهدف منها الربط المباشر مع الأتوبيس الترددي السريع BRT، وده هيسهّل انتقال الركاب بين المترو والأتوبيس الترددي بدل الاعتماد على أكتر من وسيلة مواصلات.
كمان المشروع يستهدف تخفيف الضغط على محطة شبرا الخيمة وميدان المؤسسة، اللي بيشهدوا كثافات كبيرة من الركاب، مع توفير خيارات أكتر للتنقل اليومي لسكان المناطق المحيطة.
والأهم إن التوسع ممكن ميقفش عند الدائري.. لأن الهيئة القومية للأنفاق بتدرس كمان استكمال مد الخط التاني لحد مدينة قليوب، وده معناه إن مناطق جديدة في القليوبية ممكن تستفيد من شبكة المترو مستقبلًا.
والمشروع سبق وصدر له قرار باعتباره من أعمال المنفعة العامة، مع تخصيص الأراضي الحكومية اللازمة لتنفيذه لصالح الهيئة القومية للأنفاق.
لكن لازم نوضح إن المحطات الثلاث لسه ضمن مشروع قيد الدراسة، ومفيش موعد معلن حتى الآن لبدء التشغيل أو استقبال الركاب.
فهل امتداد المترو للدائري، وبعده قليوب، يقدر يخفف زحمة المواصلات في شمال القاهرة والقليوبية؟ ده اللي هتوضحه الخطوات المقبلة للمشروع.
