تحرك مفاجئ لسعر الدولار.. إيه اللي بيحصل في كواليس سوق الصرف
هو ايه اللي بيحصل بالظبط في سوق الصرف؟ وليه الدولار بدأ يتحرك تاني بعد ما كان في سلسلة نزول واضحة؟ وهل الارتفاع ده له معنى اقتصادي حقيقي؟ ولا مجرد حركة تصحيح؟ والأهم إزاي الدولار بيرتفع رغم إن السيولة الدولارية في البلد اتحسّنت بصورة ملحوظة؟
من بداية اليوم السوق لاحظ حركة بسيطة في سعر الدولار قدام الجنيه ارتفاع طفيف بس كفاية يخلي الناس تبدأ تسال هو ايه اللى بيحصل؟
أعلى سعر للدولار كان في بنك قناة السويس عند 47.59 للشراء و47.69 للبيع وأقل سعر كان 47.45 للشراء و47.55 للبيع في بنك القاهرة وفي المتوسط أغلب البنوك الكبيرة زي الأهلي ومصر وCIB وإتش إس بي سي سجلت حوالي 47.55 للشراء و47.65 للبيع
أرقام مشكبيرة في التحرك لكن بعد فترة طويلة من تراجع الدولار أي حركة صعود بتلفت الأنظار.. لكن السؤال المهم.. ليه الدولار يتحرك لفوق في وقت المفروض السوق فيه راحة وسيولة دولارية أكبر؟
خلال الأسابيع اللي فاتت الجنيه كسب أرض مهمة قدام الدولار ووصل لمستويات أفضل من اللي وصلها بعد تعويم مارس السنة اللي فاتت وده كان انعكاس واضح لتحسن تدفقات العملة الصعبة وزيادة الثقة في الاقتصاد المحلي.
أهم مؤشر على التحسن ده كان الاحتياطي النقدي.. البنك المركزي أعلن من أيام إن احتياطي النقد الأجنبي وصل لمستوى قياسي 50.2 مليار دولار مع نهاية نوفمبر. الرقم ده طالع بـ145 مليون دولار مقارنة بشهر أكتوبر مدفوع بزيادة 707 ملايين دولار في أرصدة الذهب.. صحيح كان فيه تراجع في حقوق السحب الخاصة وانخفاض في رصيد العملات الأجنبية لكن الزيادة الكبيرة في الذهب عوضت ده كله ورفعت الاحتياطي العام.
ومش بس الاحتياطي.. قناة السويس كمان بدأت تتعافى بعد شهور صعبة بسبب التوترات الإقليمية.. من يوليو لحد أوائل ديسمبر الإيرادات وصلت لـ1.97 مليار دولار بزيادة 17.5 % عن نفس الفترة السنة اللي فاتت.
رقم مهم لأنه بيدي إشارة إن واحدة من أهم مصادر العملة الصعبة راجعة تتحسن تدريجياً خصوصاً مع توقعات إن حركة الملاحة هترجع بقوة مع بداية 2026 لما التوترات في البحر الأحمر تنحسر.
كمان رئيس هيئة قناة السويس أسامة ربيع قال خلال لقائه ببعثة صندوق النقد اللي في مصر دلوقتي إن الإيرادات ممكن توصل لـ8 مليارات دولار في 2026-2027 و10 مليارات في 2027-2028.. التوقعات دي بتدعم رؤية إن الاقتصاد المصري داخل على مرحلة توازن أكبر في موارد العملة الصعبة.
طيب.. بعد كل التحسن ده.. ليه الدولار يعلى؟ السوق عمره ما بيمشي في خط مستقيم دايماً فيه حركات تصحيح خاصة بعد موجة هبوط طويلة كمان أوقات البنوك بتعيد ضبط أسعار الشراء والبيع حسب الطلب اليومي ورغبتها في جذب أو تقليل التدفقات..و التحرك اللي حصل النهارده مش بالضرورة يعكس أزمة لكنه غالباً إعادة تموضع طبيعية بعد فترة استقرار نسبي.
فيه كمان عوامل تانية زي توقعات المستثمرين وحركة المضاربين اللي ممكن ترفع السعر بشكل مؤقت.. ومع زيارة بعثة صندوق النقد.. الأسواق عادة بتكون حساسة لأي معلومة أو توقع اقتصادي جديد. وده يخلي أي تعديل بسيط في الأسعار مفهوم ومتوقع.
