أخبار سعيدة من البنك المركزي.. هل انتهت أزمة نقص الدولار؟
ليه احتياطي مصر من النقد الأجنبي ارتفع لأعلى مستوى في تاريخه؟ وإزاي بلد كانت بتواجه ضغوط على الدولار قدرت تحقق رقم قياسي بالشكل ده؟ وإيه دور البنك المركزي في النقلة الكبيرة دي؟ والأهم.. يعني إيه أصلاً احتياطي نقدي وليه مهم لأي دولة؟
البنك المركزي أعلن مؤخرا إن الاحتياطي النقدي وصل لـ 50.215 مليار دولار في شهر نوفمبر.. رقم ماحققنهوش قبل كده في تاريخ مصر.. لكنه ما جاش صدفة ولا مرتبط بعامل واحد، لكنه نتيجة خطوات اقتصادية متراكمة اتحطّت في اتجاه واحد هو زيادة موارد العملة الصعبة وتقوية مركز مصر المالي قدام أي صدمة ولما نشوف الزيادة اللي حصلت في شهر واحد بس حوالي 144 مليون دولار عن أكتوبر نقدرنقول إن النمو في الاحتياطي اتجاه مستمر وواضح ببيانات شهور طويلة.
أول سبب للزيادة القياسية دي هو التحسن الكبير في مصادر إيرادات مصر من العملة الأجنبية.. الصادرات بقت ماشية في اتجاه صعود من بداية السنة وده انعكس مباشرة على ميزان المدفوعات وعلى قدرة الدولة إنها تزود حجم الاحتياطي. لما التصدير يزيد الدولار يدخل بشكل مستدام وده بيعمل فرق حقيقي في الصورة الاقتصادية.
ومع الصادرات السياحة لعبت دور مهم جداً.. القطاع رجع بقوة بعد ما اتعملت إعادة هيكلة وتنظيم وترويج مختلف.. دخول السياحة كان واحد من أسرع المصادر اللي رجّعت تدفقات الدولار لسابق قوتها وفي بعض الشهور زيادتها كانت بتقفل فجوات مالية بشكل واضح.
واللي دعم كمان تحويلات المصريين العاملين بالخارج اللي بترجع تاني ترتفع بعد فترة كانت فيها متذبذبة وده مهم جداً لأنه مصدر ثابت ومش مرتبط بتقلبات زي باقي القطاعات.
لكن الصورة مش كاملة من غير الدور اللي لعبه البنك المركزي.. المركزي خلال الشهور اللي فاتت اشتغل بسياسة محسوبة كان هدفها الأساسي تثبيت السوق وتقليل الضغوط على الدولار وزيادة قدرة الجهاز المصرفي إنه يجذب تدفقات جديدة الإجراءات دي شملت ضبط سوق الصرف تحسين تشغيل السيولة الدولارية والتأكد إن التدفقات اللي داخلة البلد بتتوظف في الاتجاهات اللي تخدم الاستقرار المالي.
البنك المركزي كمان ركّز على إن الاحتياطي خط دفاع رئيسي.. وبالتالي كان فيه إدارة دقيقة للأصول الأجنبية وتوازن بين مكونات الاحتياطي علشان يبقى قادر يغطي احتياجات الاستيراد ويسند الجنيه لو حصلت أي اضطرابات عالمية خصوصاً في وقت العالم فيه تحولات اقتصادية كبيرة.
وهنا نرجع للسؤال الأساسي.. يعني إيه احتياطي نقدي؟
الاحتياطي هو رصيد الدولة من العملات الأجنبية، وده بيبقى موجود جوّه البنك المركزي. الاحتياطي ده بيتكوّن من عملات مختلفة زي الدولار واليورو والإسترليني وده غير الذهب ووحدات حقوق السحب الخاصة.. وجود مزيج متنوع من الأصول دي مهم جداً لأنه يقلل المخاطر ويحافظ على قدرة الدولة إنها تتصرف تحت أي ظرف.
أهمية الاحتياطي النقدي لأي بلد كبيرة جداً.. أول وظيفة ليه إنه يضمن قدرة الدولة إنها تستورد احتياجاتها الأساسية من غير ما يحصل ضغط مفاجئ على العملة المحلية.. والوظيفة التانية إنه يدي قوة وثقة للأسواق في قدرة البلد على الوفاء بالتزاماتها الخارجية، سواء ديون قصيرة أو طويلة الأجل.. والوظيفة التالتة إنه يساعد في حماية العملة المحلية وقت الأزمات بحيث مايحصلش تقلبات حادة تضرب الاقتصاد.
ولما الاحتياطي يوصل لأعلى مستوى في تاريخه ده معناه إن البلد عندها قدرة أكبر على مواجهة أي صدمات سواء كانت أسعار سلع عالمية اضطرابات مالية دولية أو حتى تقلبات سياسية في محيطها الإقليمي.. وده بيدي مساحة أوسع للحكومة إنها تنفّذ خطط اقتصادية بدون ما تبقى تحت ضغط دايم من نقص الدولار.
واللي يهم هنا إن النمو مش مبني على قروض أو تدفقات مؤقتة لكنه مبني على مصادر مستدامة زي التصدير والسياحة والتحويلات وده أهم حاجة في الموضوع كله.. لأن الاحتياطي لما يزيد من مصادر حقيقية بيبقى ليه وزن أكبر وقدرة أعلى إنه يفضل ثابت أو في اتجاه صعود لفترة طويلة.
