من الإفلاس لامبراطورية ملابس.. حكاية أشهر مليونير في العالم

من الإفلاس لامبراطورية ملابس.. بيعمل 6 ونص مليون دولار في السنة.. وبسبب الهدوم المستعملة عرف يقلب حياته من شاب مديون لاشهر مليونير في العالم.. يا ترى إيه حكاية الشاب ده؟

الحكاية بدأت سنة 2008 مع راجل اسمه ريك سينكو كان أب اتفصل من شغله وفلوسه خلصت ومش عارف يطعم ابنه اللي عنده 5 سنين.. كان في لحظة حرجة يا ينهار يا يتغير.

وفي يوم وهو بيدوّر على أي فرصة لقى موبايل على موقع Craigslist بـ 35 دولار اشتراه ودخل يبيعه على eBay بـ 75 دولار.. واللحظة دي كانت أول لمبة تنوّر في دماغه قال لنفسه هو أنا ليه ماعملش كده على طول.. ومن هنا بدأ التحول الحقيقي.

ريك ما استناش ولا قال بكرة نزل يدور على أي حاجة مستعملة يقدر يعيد بيعها بدأ يتعلم البراندات ويعرف قيمة الملابس والأجهزة والشنط وكل حاجة تانية كان يشتغل لحد عشرين ساعة في اليوم يلف بين المزادات والأسواق والمحلات لحد ما بقى عنده القدرة إنه يميز القطعة اللي تتباع بذهب.

ومع مرور الوقت بقى يقدر يبني علاقات مع التجار بقوا يحجزوا له أحسن بضاعة وكان كل يوم يعرض حوالي 250 قطعة على eBay بمساعدة ناس بتصور وبتجهز وبتشحن.

سنة ورا سنة المبيعات بدأت تعلى في 2017 حقق نص مليون دولار وفي 2023 وصل لمبيعات تخطت الـ 2.5 مليون دولار لكنه في اللحظة دي حس إن شغله الفردي وصل لحد معين فقرر ياخد قفزة أكبر.

أسس شركته Technsports وهي شركة متخصصة في بيع الملابس المستعملة بالجملة للتجار التانيين الشركة بقت تبيع حوالي 5000 قطعة ملابس في اليوم وفي 2024 جابت إيرادات وصلت لـ 6.5 مليون دولار وهامش الربح على كل قطعة حوالي 50%.

الراجل اللي مكنش معاه تمن أكلة بقى عنده إمبراطورية وسافر أمريكا من شرقها لغربها وبدأ يخطط يتقاعد بدري بعد ما ابنه يخلص ثانوي.

ورغم كل النجاح ده لسه بيصحى كل يوم يشتغل ويقول لما تتعلم إزاي تضاعف فلوسك إزاي توقف ويؤكد إن النجاح ده جاي من شغل كتير وتضحيات وإنه عمره ما وقف.

وده كان الطريق من راجل مفلس تمامًا لصاحب ملايين وكل ده بدأ من موبايل بـ 35 دولار.