هبوط مفاجئ في أسعار الحديد.. إيه اللي حصل؟
أسعار الحديد النهاردة عاملة مفاجأة الحديد نازل، والأسمنت طالع وفقًا لبيانات بوابة الأسعار المحلية والعالمية.. سعر طن الحديد الاستثماري وصل لـ حوالي 37 ألف و700 جنيه بانخفاض أكتر من 800 جنيه.
وسعر طن حديد عز نزل لـ حوالي 39 ألف و400 جنيه برضه بتراجع تخطى 800 جنيه، وعلى الناحية التانية الأسمنت طالع لفوق، وسعر الطن الرمادي وصل لـ حوالي 4095 جنيه بزيادة أكتر من 250 جنيه.
طيب السؤال الأهم ليه الحديد بينزل؟ وإيه اللي حاصل في السوق؟ السبب إن الفترة الأخيرة حصل هدوء واضح في الطلب مع تباطؤ حركة البناء في بعض المناطق.
غير كده، نزول أسعار الخامات عالميًا ساعد إنه يقلل التكلفة، وكمان في مصانع بدأت تزود المعروض في السوق عشان تحرك المبيعات.
وده ضغط الأسعار لتحت.. يعني الأسعار ممكن تفضل تتحرك طالعة ونازلة حسب العرض والطلب، بس الواضح إن السوق داخل على موجة تغيرات كبيرة الفترة الجاية.. بس خليني اقولك أسباب انخفاض أسعار الحديد بشكل مختصر.
تراجع الطلب المحلي بسبب هدوء حركة البناء في بعض الفترات، وانخفاض أسعار خام الحديد عالميًا، وزيادة المعروض من بعض المصانع لدفع المبيعات، ده غير استقرار سعر الدولار نسبيًا مما قلل تكلفة الاستيراد والشحن، والمنافسة بين التجار والمصانع لتصريف المخزون قبل تغيرات الأسعار.
