درع مصر المائي الجديد.. 49 محطة تحلية جاهزة لمواجهة تحدي سد النهضة
مع التحديات اللي بتواجه مصر بسبب سد النهضة وقلة الموارد المائية، بقت محطات تحلية مياه البحر مش مجرد مشروع إضافي.. دي بقت خطة استراتيجية للدولة علشان تأمّن نفسها مائيًا، وتبني بديل قوي لأي نقص ممكن يحصل في نهر النيل، ومع الإعلان عن 49 موقع جاهزين للتحلية في 10 محافظات، بقى واضح إن مصر داخلة على مرحلة جديدة من إدارة المياه.. مرحلة فيها تكنولوجيا، تخطيط، واستغلال صح لكل متر أرض ممكن يخدم التنمية.
الأزمة المائية اللي بتتعرض ليها مصر خلال السنين اللي فاتت، خاصة مع استمرار التعنت الإثيوبي في ملف سد النهضة، خلت الدولة تتحرك في مسار مهم جدًا وهو مسار تحلية مياه البحر، مش كخطة مؤقتة.. لكن كبديل استراتيجي طويل المدى ممتد لحد سنة 2050.
التحلية بقت النهاردة جزء من "درع مصر المائي" الجديد، ومشروعات التحلية مش مجرد محطات عشوائية، لكن كل موقع مختار بدقة، وداخل ضمن مخطط قومي كامل، الدولة رصدت 49 موقع مناسب لإنشاء محطات التحلية، موزعين على 10 محافظات ساحلية، 32 موقع منهم بالفعل صدر ليهم قرارات جمهورية، و6 مواقع في الطريق، والباقي تحت الدراسة الفنية والتخطيطية، علشان يكون كل مشروع محسوب من أول نقطة مياه لحد شبكة التوزيع.
فكرة اختيار المواقع مش مبنية على إن المنطقة ساحلية وخلاص لأ.. كل موقع لازم يحقق أعلى إنتاجية، وأقل تكلفة تشغيل، ويخدم مناطق فيها احتياج فعلي.. سواء مدن جديدة، سياحة، مصانع، أو مناطق بعيدة عن مصادر مياه الشرب التقليدية، ده غير إن جزء كبير من الأراضي اللي استردتها الدولة في موجات الإزالة الأخيرة دخلت كمان في إعادة التخطيط، وبعضها هيتحوّل لمشروعات مائية أو خدمية تخدم نفس المنظومة.
والمركز الوطني لتخطيط استخدامات أراضي الدولة بيشتغل كعقل التخطيط اللي بيربط كل الجهات ببعض، شغلهم الأساسي إن كل شبر أرض يتوظف صح، الأراضي المستردة مثلًا بيتم دراستها واحدة واحدة.. يشوفوا إيه اللي ينفع يتحول لمشروع تنموي، إيه اللي يخدم مبادرة حياة كريمة، وإيه اللي ممكن يتباع في مزاد ويوفر دخل للدولة، والمهم إن جزء كبير من الأراضي دي مناسب لإنشاء مشروعات داعمة للتحلية.. زي البنية التحتية، خطوط الكهرباء، أو مناطق خدمات.
وخليني اقولك ان محطات التحلية نفسها مش مجرد مباني بتطلع مية صالحة للشرب، دي منظومة كاملة بتغير خريطة المياه في مصر، التكنولوجيا الجديدة اللي الدولة بتعتمد عليها بتوفر مياه بجودة عالية، وبتستخدم طرق توفير طاقة تقلل التكلفة على المدى الطويل، وده مهم جدًا خصوصًا إن مصر بقت محتاجة مصادر مياه مستقرة تقدر تعتمد عليها بشكل دائم.
والتحلية مش بس حل لأزمة سد النهضة.. دي كمان وسيلة لدعم المدن الساحلية اللي بتتوسع بسرعة، وده هيساعد إن مياه النيل توجه بشكل أكبر للزراعة والمصانع والمناطق اللي مالهاش أي بديل تاني.
ومع استمرار خطة التحلية لحد 2050، واضح إن مصر بتحط أساس مائي جديد بعيد عن الضغوط الخارجية، وقادر يوفر احتياج ملايين المواطنين لسنين طويلة، الخطة مش مبنية على رد فعل.. لأ، دي رؤية كاملة علشان المستقبل.
ومشروعات التحلية بقت النهاردة جزء من أمن مصر القومي.. وجزء من بناء دولة بتتوسع في الزراعة والصناعة والعمران.. ومش مستنية اعتمادها كله على مصدر واحد للمياه.
