هبوط مفاجئ للدهب.. تحرك مهم لوزارة البترول.. طرح جديد للمركزي
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، هبوط مفاجيء للدهب، وتحرك مهم لوزارة البترول، وطرح جديد للمركزي.
والبداية من سوق الصاغة حيث عاودت أسعار الدهب الهدوء في السوق المصري وكمان عالميا خلال تعاملات النهارده، وده بسبب عمليات جني الأرباح لكن في نفس الوقت الطلب لسه موجود على الدهب كملاذ آمن وده خلى الهبوط يبقى محدود مع استمرار التوترات السياسية والاقتصادية على مستوى العالم حسب تقرير صادر عن منصة آي صاغة.
سعيد إمبابي المدير التنفيذي لمنصة آي صاغة قال إن أسعار الدهب في السوق المصري نزلت حوالي خمسة وخمسين جنيه وسجل جرام الدهب عيار واحد وعشرين حوالي خمسة آلاف تسعمية وخمسين جنيه في حين إن سعر الأونصة عالميا نزل حوالي تسعة واربعين دولار ووصل لأربعة آلاف ربعمية خمسة واربعين دولار.
وأضاف إمبابي إن سعر جرام الدهب عيار اربعة وعشرين سجل حوالي ستة آلاف وتمانمية جنيه وسعر جرام الدهب عيار تمنتاشر وصل لحوالي خمسة آلاف ومية جنيه بينما سعر الجنيه الدهب ارتفع ووصل لنحو سبعة واربعين ألف وستممية جنيه.
وفي نفس السياق أسعار الدهب والفضة كمان نزلت مع بداية تعاملات النهارده في الولايات المتحدة وده نتيجة جني أرباح من متداولي العقود الآجلة على المدى القصير.
ونروح لوزير البترول المهندس كريم بدوي اللي قابل هو والوفد المرافق ليه مسؤولين وزارة الطاقة والتجارة والصناعة في جمهورية قبرص في العاصمة نيقوسيا وده في إطار التنسيق المستمر والمجهودات المشتركة بين فرق العمل في البلدين علشان يسرعوا تنفيذ المشروعات المتفق عليها في مجال الغاز الطبيعي.
وخلال اللقاء تم مناقشة سبل التعاون الاستراتيجي لدفع المشروعات المشتركة المهمة وعلى رأسها ربط حقول الغاز القبرصية بالبنية التحتية والتسهيلات الموجودة في مصر علشان يتم إعادة تصدير الغاز من خلال مصر للأسواق الأوروبية.
وفي نهاية اللقاء الجانبين أكدوا على أهمية استمرار التنسيق الفني خلال المرحلة اللي جاية وعمل اجتماعات دورية لمتابعة تنفيذ كل اللي بيتفقوا عليه بما يحقق مصلحة البلدين ويقوي مكانتهم الإقليمية في مجال الطاقة.
ونروح للبنك المركزي المصري اللي أعلن من خلال موقعه الرسمي عن طرح صكوك سيادية بعائد ثابت بإجمالي قيمة سبعة مليارات جنيه لمدة تلات سنين وده يوم الاثنين الموافق اتناشر يناير الفين ستة وعشرين على إن ميعاد الاستحقاق يبقى في تلاتتاشر يناير الفين تسعة وعشرين.
وقال البنك إن الصكوك دي هتطرح بعائد سنوي ثابت واحد وعشرين فاصل اتنين اتنين اربعة في المية والعائد هيتصرف كل ست شهور.
والصكوك السيادية بتعتبر واحدة من أدوات التمويل المتوافقة مع الشريعة الإسلامية وبتصدرها الدولة علشان تمول مشروعاتها المختلفة وبتتميز بعائد ثابت بيتصرف بشكل دوري وده بيدي المستثمرين استقرار في السيولة وعائد واضح ومحدد وكمان بتبقى بديل للأدوات التقليدية زي السندات وبتساعد على تنويع مصادر التمويل وتقليل تكلفة الاقتراض.
ونختم من وزارة الإسكان حيث المهندس شريف الشربيني وزير الإسكان والمرافق والمجتمعات العمرانية عقد اجتماع علشان يتابع ويستعرض التصور المبدئي لمشروع سكني جديد للإسكان المتوسط وده ضمن خطة الوزارة للتوسع في مشروعات سكنية متنوعة تناسب شرائح مختلفة من المواطنين بحضور مسؤولي الوزارة وهيئة المجتمعات العمرانية الجديدة وده تنفيذا لتوجيهات الرئيس عبد الفتاح السيسي بتوفير مشروعات سكنية تحقق توازن بين جودة التنفيذ ومراعاة البعد الاجتماعي.
وأكد وزير الإسكان إن مشروع الإسكان المتوسط الجديد جاي ضمن سياسة الدولة لتوفير سكن مناسب وحياة كريمة للمواطنين بمختلف مستويات الدخل مع تخطيط جيد لتنمية المدن الجديدة.
وكمان الاجتماع ناقش المدن المقترح تنفيذ المشروع فيها واللي هتشمل العبور الجديدة وأكتوبر الجديدة وحدائق العاشر من رمضان ومدينة العاشر من رمضان وبرج العرب الجديدة والسادات والمنيا الجديدة وسوهاج الجديدة.
