كيفية الحصول على أرض في الـ 1.5 مليون فدان.. مرونة في السداد وأقساط حتى 10 سنوات
مشروع الـ1.5 مليون فدان بقى واحد من أهم المشروعات اللي بتغير شكل الزراعة في مصر، مشروع ضخم، الدولة عاملاه علشان توسع الرقعة الزراعية وتفتح أبواب استثمار لناس كتير، سواء شباب عايزين يبدأوا صغير.. أو شركات كبيرة عايزة تتوسع
وفيه ناس كتير بتسأل: أعمل إيه علشان أقدّم؟ إيه الشروط؟ والتقسيط بيمشي إزاي؟ الموضوع مش معقد زي ما الناس فاكرة.. بالعكس، الأنظمة مرنة ومناسبة لكل الإمكانيات.
مشروع المليون ونص فدان اللي بتنفذه شركة الريف المصري الجديد يعتبر دلوقتي واحد من أكبر فرص الاستثمار الزراعي في البلد.
الشركة فاتحه باب التقديم لأنظمة متنوعة، وكل نظام معمول بحيث يناسب المستثمر اللي داخل بمساحة صغيرة أو شركة دخلة بمشروع ضخم، لكن أهم شرط عندهم هو الجدية.. لأن الهدف الأساسي من المشروع هو استصلاح أرض جديدة وإنتاج حقيقي على أرض الواقع.
ولو حد حابب يحصل على أرض هناك، أول خطوة هي إنه يقدم طلب من خلال المنصة الإلكترونية للريف المصري ويكون مجهز الأوراق الأساسية زي بطاقة الرقم القومي وشهادة الميلاد والمؤهل، بعد كده بيدفع مبلغ جدية الحجز، ويبدأ يختار الأرض اللي عايزها، وبعدها يكمل باقي الإجراءات حسب نظام التعاقد اللي هيختاره.
والريف المصري موفرة أكتر من نظام، فيه نظام التمليك اللي بيكون مناسب للمساحات الصغيرة والمتوسطة، وفيه نظام حق الانتفاع اللي معمول للمساحات الأكبر ومناسب أكتر للشركات اللي بتشتغل على استثمارات طويلة المدى، وكل نظام ليه شروط وملفات معينة الشركة بتطلبها علشان تضمن إن اللي هيستلم أرض يقدر يشتغل عليها بجد.
وبالنسبة للمساحات، الشركة عاملة تلات اختيارات مختلفة، أول اختيار بيبدأ من مساحة صغيرة لحد 238 فدان، وده غالبًا مناسب للمجموعات أو المستثمر الصغير اللي عايز يبدأ مشروع يشتغل عليه بنفسه، بعدها فيه المساحة المتوسطة اللي ممكن توصل لحد 2000 فدان، وده عادة بيكون للشركات اللي عندها فريق وتشغيل أكبر، أما أكبر اختيار فهو 5000 فدان وده للمشروعات العملاقة اللي بتشتغل بأنظمة زراعة متطورة.
الشركة كمان محددة مجموعة أوراق مهمة لأي شركة عايزة تتقدم.. لازم تكون شركة مساهمة أو ذات مسئولية محدودة، ومعاها البطاقة الضريبية والسجل التجاري وعقد التأسيس وشهادة بنكية تثبت قدرتها المالية، لازم كمان تعمل دراسة جدوى حقيقية وخطة زمنية للمشروع، لأن الأرض دي مش مجرد حيازة.. دي مسئولية وإنتاج واستصلاح.
ومن أهم الشروط الأساسية كمان إن نشاط الشركة لازم يكون مرتبط بالزراعة أو استصلاح الأراضي الصحراوية، ولازم يكون لها كيان قانوني في مصر بقاله على الأقل عشرين سنة، ولو النشاط هيكون في شبه جزيرة سيناء لازم موافقة أمنية، والشركة بتطلب كمان شهادة بأرصدة الشركة أو بيان بأصولها، علشان تتأكد إن المستثمر عنده قدرة يكمل المشروع للنهاية.
أما أنظمة السداد فهي مرنة جدًا، الدفع بيكون 20% كمقدم، والباقي على أقساط تمتد من 9 لـ 10 سنين بفائدة متناقصة 14%، وكمان في فترة سماح من 4 لـ 5 سنين بدون أي فوائد، يعني فيه فرصة حقيقية يبدأ يشغل الأرض الأول قبل ما يبدأ يسدد.
والدولة في السنين الأخيرة شغالة على خطط استصلاح ضخمة، مش بس علشان تزود الإنتاج الزراعي، لكن كمان علشان تخلق فرص عمل جديدة وتفتح مجتمعات عمرانية في مناطق كانت صحراوية، من غير ما يفضل كل الضغط على الدلتا والوادي، البنية التحتية اتطورت، طرق ومية وطاقة، وكل ده بيشجع أي مستثمر عنده رغبة يدخل المجال.
مشروع الـ1.5 مليون فدان مش مجرد أرض.. ده فرصة حقيقية للي عايز يبدأ أو يكبر نشاطه الزراعي، بطرق دفع سهلة وخطط واضحة.
