تحرك هام للمركزي.. وشركات مصرية تنفذ مشروعات كبرى في السعودية والإمارات
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تحرك هام للمركزي، وارتفاع مفاجئ للدهب، وشركات مصرية تنفذ مشروعات كبرى في السعودية والإمارات.
والبداية من البنك المركزي المصري، اللي أعلن إنه هيطرح أذون خزانة دولارية لمدة سنة واحدة، بقيمة مليار ونص دولار.
الأذون دي هتحل محل أذون تانية بنفس القيمة كانت مستحقة، وبعائد متوسط حوالي 4.5%.. والحكومة بتستدين عن طريق السندات وأذون الخزانة على آجال مختلفة، وبتعتبر البنوك الحكومية هي المشتري الأكبر للأدوات دي.
ومن هنا نروح لوزارة المالية، اللي أعلنت عن أول إصدار صكوك سيادية للسوق المحلية، من خلال نظام المتعاملين الرئيسيين، بقيمة 3 مليارات جنيه لمدة 3 سنين.
الوزارة وضحت إن الإصدار ده جزء من استراتيجية الدولة لتنويع مصادر التمويل وخفض التكلفة، وكمان لتوسيع قاعدة المستثمرين وجذب شريحة جديدة مهتمة بالأدوات المالية المتوافقة مع الشريعة الإسلامية.
الهدف في الآخر هو خفض تكلفة التمويل، وإطالة عمر الدين العام، وتنويع أدواته بشكل يخدم استقرار الاقتصاد.
ونروح بعد كده لسوق الصاغة، اللي شهد النهارده ارتفاع في أسعار الذهب في السوق المحلية.
والدهب عيار 21 – اللي بيعتبر الأكتر تداول بين المصريين سواء للزواج أو الادخار – سجل النهارده حوالي 5435 جنيه للجرام.
أما عيار 24 فسجل 6211.5 جنيه للجرام، وده الأعلى جودة لأنه أنقى في نسبة الذهب الخالص، وكان الأسبوع اللي فات كسر حاجز 6600 جنيه.
العيار ده بيفضله المستثمرين اللي بيحبوا يحتفظوا بالدهب الخام، لكن الإقبال عليه مش كبير بسبب سعره العالي.
أما عيار 21، فزي ما قولنا، هو الأكتر شعبية عند المصريين، وبيعتبر المؤشر الرئيسي لحركة السوق لأنه مرتبط بعادات الزواج والادخار.
وسجل النهارده 5435 جنيه للجرام.
عيار 18 وصل لـ 4658.5 جنيه للجرام، وده بيقبل عليه الشباب أكتر علشان سعره مناسب وتصميماته متنوعة وحديثة، وبيعتبر خيار محبوب لمحبّي الموضة.
عيار 14 سجل 3623 جنيه للجرام، وده بيكون الأنسب للي بيدوروا على قطع دهب اقتصادية وسعرها في المتناول.
أما الجنيه الدهب فسجل 43480 جنيه، وبيزن 8 جرام من عيار 21.
ونروح دلوقتي لقطاع البترول، المهندس كريم بدوي، وزير البترول والثروة المعدنية، شارك في منتدى التجارة والاستثمار المصري الخليجي اللي نظمته وزارة الخارجية بالتعاون مع الأمانة العامة لمجلس التعاون الخليجي، وبمشاركة وزراء من مصر ومن دول الخليج.
الوزير أكد إن مصر عندها بنية تحتية قوية جدًا في مجال البترول والغاز، وبتسعى لتعظيم الاستفادة منها علشان تكون مركز إقليمي لتجارة وتداول الطاقة.
وأشار إن في فرص ضخمة للتعاون مع القطاع الخاص في الدول العربية، خصوصًا إن مصر تعتبر بوابة مهمة للأسواق الإفريقية والأوروبية.
كمان دعا الوزير لزيادة الاستفادة من الشركات المصرية اللي شغالة بره مصر زي إنبي، وبتروجت، وصان مصر، والحفر المصرية، لأن الشركات دي عندها خبرات كبيرة جدًا وسجل قوي في تنفيذ مشروعات ضخمة في الخليج، خصوصًا في السعودية والإمارات وعُمان.
ونختم بوزارة النقل، اللي شغالة دلوقتي على تنفيذ 70 كيلومتر من الأرصفة الجديدة داخل الموانئ المصرية، علشان تستقطب خطوط ملاحية عالمية جديدة.
وده بحسب ما قاله الفريق كامل الوزير، نائب رئيس مجلس الوزراء ووزير النقل والصناعة، خلال جلسة حوارية بمعرض النقل الذكي.
الوزير أشار إن النقل مستهدفة توصل لـ 107 كيلومتر أرصفة جوه الموانئ خلال السنتين الجايين، وكمان بيتم إنشاء 3 موانئ جديدة ضمن خطة لتوسيع حركة التجارة المصرية، علشان يوصل إجمالي عدد الموانئ البحرية لـ 18 ميناء.
أما بالنسبة لقطاع السكك الحديدية، فكشف الوزير إن الدولة شغالة على تطوير حوالي 10 آلاف كيلومتر من خطوط السكة الحديد، وكمان إضافة 7 آلاف كيلومتر من الطرق والكباري على مستوى الجمهورية.
وبكده تبقى شبكة الطرق في مصر وصلت لـ 30 ألف كيلومتر، مع متابعة مستمرة لتطوير الطرق الداخلية في المحافظات، علشان تضمن حركة نقل أسرع وأأمن.
