من صحراء لقرى عالمية.. خطة تنمية شاملة بتحول غرب مصر لمركز عالمي للسياحة والاستثمار
من الصحراء للنور.. خطة تنمية شاملة بتحول منطقة غرب مصر لمركز عالمي للسياحة والاستثمار ومشروعات ضخمة بتغير شكل الأرض.
من العلمين الجديدة والضبعة النووية.. لحد الموانئ والزراعة والطاقة وحياة كريمة اللي خلت القرى تعيش واقع جديد ومصر كلها تتحرك لمستقبل مختلف..يا ترى إيه اللي بيحصل لغرب مصر وازاي غيرت معالم السياحة تعالوا نعرف ايه الحكاية.
اللي بيحصل في غرب مصر مش حاجة صغيرة ديه حاجة هتقلب كل الموازين.. والمكان اللي كان من كام سنة مجرد صحراء وسكون بقى دلوقتي نموذج للتنمية في مصر كلها في فترة قصيرة جدًا الدولة قدرت تحول المنطقة دي لمركز سياحي واستثماري كبير والمشروعات اللي اتعملت هناك غيرت شكل الحياة بالكامل.
البداية كانت من مدينة العلمين الجديدة المدينة اللي بقت درة البحر المتوسط مكان حديث بكل المقاييس بيجمع بين السياحة والاستثمار والسكن الراقي وفتح فرص عمل ضخمة للناس هناك العلمين الجديدة أثبتت إن التنمية مش بس في القاهرة لكن في كل شبر من البلد.
وفي نفس الوقت حلم محطة الضبعة النووية اللي اتأجل لأكتر من أربعين سنة بقى حقيقة المشروع ده هيكون مصدر طاقة آمنة ونظيفة وهيقلل الاعتماد على الوقود التقليدي وكمان هيفتح مجالات جديدة في الصناعة والتكنولوجيا.
شبكات الطرق كمان اتغيرت بشكل كبير الطريق الدولي الساحلي مطروح إسكندرية وطريق وادي النطرون العلمين ومحور روض الفرج الضبعة بالإضافة للقطار الكهربائي السريع اللي هيربط السخنة بالعلمين ومطروح كل ده خلا حركة النقل أسهل وأسرع وسهل الاستثمار والسياحة في المنطقة.
كمان في مشروعات زراعية ضخمة زي الدلتا الجديدة ومستقبل مصر ومزارع قاعدة محمد نجيب المشروعات دي رجعت الحياة لأراضي كانت مهجورة وبقت بتنتج من جديد ووفرت فرص عمل كتير للشباب وساهمت في تحقيق الاكتفاء الذاتي من الغذاء.
وفي مجال النقل البحري والتجارة بدأ تنفيذ ميناء جرجوب البحري وتطوير ميناء السلوم البري وده معناه إن غرب مصر بقت بوابة جديدة لمصر على أوروبا وشمال إفريقيا الموانئ دي هتزود حركة التبادل التجاري وتفتح مجالات استثمار ضخمة.
كمان الدولة بدأت تنفيذ محطات لتحلية مياه البحر على امتداد المدن الساحلية وده خطوة مهمة جدًا علشان تضمن مياه نظيفة ومستدامة للأجيال الجاية.
ولازم نذكر مبادرة حياة كريمة اللي فعلاً غيرت شكل القرى في مطروح خلال المرحلة الأولى بس اتنفذ أكتر من 103 مشروع بنسبة إنجاز 100 في المية في 11 قرية ودخلت 23 قرية و7 تجمعات صحراوية المرحلة التانية القرى دي اتغيرت بالكامل خدمات متوفرة بنية تحتية متطورة ومدارس ووحدات صحية على أعلى مستوى.
كل المشروعات دي لما تبص عليها هتلاقيها مش منفصلة عن بعض بالعكس مترابطة وبتكمل بعض التنمية في الطرق بتخدم الاستثمار والطاقة بتدعم الزراعة والزراعة بتفتح أبواب التصدير والنتيجة في النهاية إن مصر كلها بتتحرك لقدام بخطى ثابتة.
اللي بيحصل في غرب مصر مش مجرد تطوير ده تحول كامل في شكل الدولة وطريقتها في التفكير إحنا داخلين على مرحلة جديدة فيها كل حاجة بتتبني على رؤية واضحة ومستقبل بيبدأ فعلاً من النهارده مصر رايحة لمكان تاني خالص ومفيش رجوع لورا بعد كده.
