إقامة أضخم مشروع للطاقات المتجددة في سيناء.. سر لقاء وزير الكهرباء مع تحالف عالمي
الكل بيسأل دلوقتي سيناء رايحة على فين، بعد ما وزارة الكهرباء كشفت عن أضخم مشروع متكامل للطاقات المتجددة فيها، بس إيه حكاية المشروع العملاق اللي هينور مصر كلها من الشمس والميه؟.. وليه العالم كله بقى بيجري ناحية الهيدروجين الأخضر؟.. وهل المشروع ده هيخلي مصر فعلاً من الدول الرائدة في الطاقة النظيفة؟.. وإزاي هنقدر نولد كهربا 24 ساعة من غير نقطة بنزين واحدة؟
تخيل معايا كده لما نقول إن سيناء مش بس أرض الذهب والنخيل.. لكن كمان هتبقى قريب أرض "الطاقة" في مصر.. لأننا بنتكم عن أضخم مشروع متكامل للطاقات المتجددة بيتجهز في سيناء، وده مش أي مشروع، ده خطوة جبارة في طريق مصر ناحية المستقبل الأخضر والطاقة النظيفة.
القصة بدأت لما وزير الكهرباء والطاقة المتجددة، الدكتور محمود عصمت، قعد مع وفد تحالف عالمي اسمه رينيرجي جروب، وده تحالف ضخم بيضم شركات عالمية ومحلية، زي "رينيرجي جروب بارتنرز" اللي هي المطور الرئيسي، و"جرين تك إيجيبت" الشريك التقني، و"أوك القابضة" اللي هتمسك الجانب المالي والاستثماري.
الاجتماع كان في العاصمة الإدارية، وكشفوا فيه مشروع ضخم هيغير شكل الطاقة في مصر بالكامل.. المشروع هيكون متكامل يعني مش محطة واحدة وخلاص، ده هيضم محطة طاقة شمسية ضخمة، ومحطة هيدروجين أخضر، ومحطة ضخ وتخزين مائي.. يعني كهربا نظيفة 24 ساعة في اليوم من غير توقف ولا تلوث، ولا ضغط على الشبكة القومية.
التفاصيل بقى عبارة عن إيه؟.. المشروع هيولد طاقة شمسية بقدرة 15 ألف ميجاوات، وكمان محطة ضخ وتخزين مائي بسعة 4400 ميجاوات، عشان تقدر تمد الشبكة القومية بالكهربا على مدار اليوم بقدرة مستدامة توصل لـ 3250 ميجاوات.. وفوق كل ده، هيتم إنتاج الهيدروجين الأخضر من خلال محللات كهربائية بقدرة 1850 ميجاوات، وده يعتبر من أنظف أنواع الطاقة في العالم دلوقتي.
الوزير أكد أن المشروع ده جزء من خطة الدولة للتحول الطاقي وإننا نقلل اعتمادنا على الوقود الأحفوري، ونزوّد نصيب الطاقة المتجددة في مصر كل سنة بحوالي 2500 ميجاوات لحد سنة 2030.. كمان ركز على أهمية تخزين الطاقة واستخدام محطات الضخ والتخزين المائي عشان نضمن استقرار الشبكة دايمًا.
وفي الآخر، وزير الكهرباء وجه أن الطاقة اللي هتطلع من محطة الضخ والتخزين دي تكون الأساس اللي بيتغذى منه الشبكة القومية، وأكد أن التعاون بين الدولة والقطاع الخاص، سواء المصري أو الأجنبي، هو اللي هيخلي المشروع ده نموذج عالمي في استخدام موارد سيناء الطبيعية بطريقة ذكية ومستدامة.. يعني من الآخر، سيناء مش بس هتبقى منبع للخير، دي كمان هتبقى منبع للطاقة النظيفة اللي هتغذي مصر كلها وتفتح باب جديد للاستثمار والمستقبل.
