طاقة بلا حدود للغذاء.. مصر تنفق 60 مليار جنيه لتأمين احتياجات 5 مناطق زراعية عملاقة بالكهرباء
في خطوة ضخمة بتأكد على رؤية مصر لتحقيق الاكتفاء الذاتي في الغذاء وتنمية الصحراء، الدولة بتنفذ واحد من أكبر مشاريعها في مجال الطاقة الزراعية.
وزارة الكهرباء والطاقة أعلنت إن تكلفة مشروعات توفير الكهرباء لخمس مناطق زراعية كبرى وصلت لـ 60 مليار جنيه، وده ضمن خطة قومية هدفها تأمين احتياجات ملايين الأفدنة من الطاقة اللازمة للري والزراعة الحديثة.
المشروع العملاق اللي بيتنفذ دلوقتي بيشمل توفير الطاقة الكهربائية لمشروعات جهاز مستقبل مصر للتنمية الزراعية في مناطق:
الـدلتا الجديدة، توشكى، مزارع المنيا، مزارع بني سويف، وروافع سينا.
والهدف الأساسي هو إن كل منطقة زراعية جديدة يكون عندها شبكة كهرباء قوية ومستقرة تقدر تشغل أنظمة الري والطلمبات ومراكز التعبئة والتخزين، من غير أي انقطاع أو ضعف في التيار.
وزير الكهرباء والطاقة الدكتور محمود عصمت قال إن المشروع ده بيجي ضمن رؤية الدولة لتنمية الصحراء وتعظيم الاستفادة من الموارد الطبيعية، وده معناه إن الكهرباء مش بس رايحة للبيوت، لكن كمان بقت عنصر أساسي في التنمية الزراعية والصناعية.
الوزير كمان قال خلال جولته في الدلتا الجديدة إنه اطمأن على جاهزية محطات المحولات والروافع اللي تم تشغيلها بالفعل خلال الشهور اللي فاتت، واللي بتوفر تغذية كهربائية مستقرة للمزارع العملاقة في المنطقة.
ومن أبرز المحطات دي محطة محولات ND5 بجهد 220/66/11 كيلوفولت وسعة 350 ميجافولت أمبير، واللي هتبدأ التشغيل الفعلي مع بداية الشهر الجاي.
كمان تم وضع الجهد وتشغيل عدد من الخطوط الهوائية اللي بتربط المحطات ببعض، منها خط (ND5/أكتوبر 500) بطول 28.4 كم، وخط (ND6/ND7) بطول 50 كم، وكلها مجهزة بأحدث المعايير الفنية لضمان استقرار الشبكة القومية للكهرباء.
وخليني اقولك ان عدد محطات المحولات في نطاق "مستقبل مصر" وصل ل 9 محطات، منها:
6 محطات جهد 220/66/11 كيلوفولت بإجمالي سعة 2100 ميجافولت أمبير.
3 محطات جهد 66/11 كيلوفولت بإجمالي سعة 320 ميجافولت أمبير
كمان فيه 15 خط ربط بطول 500 كيلومتر تقريبًا لربط المحطات ببعض وبالشبكة القومية.
أما في منطقة روافع الحمام شمالًا، فبيتم إنشاء 4 محطات محولات بإجمالي سعة 940 ميجافولت أمبير، إلى جانب 7 خطوط ربط بطول 130 كيلومتر
وفي روافع رشيد شرقا، بيتنفذ 3 محطات إضافية بإجمالي سعة 820 ميجافولت أمبير و5 خطوط ربط جديدة بتكلفة وصلت لـ 35 مليار جنيه.
بس المشروع ده مش مجرد خطوط ومحطات، لكنه ركيزة أساسية للأمن الغذائي في مصر.
وتوفير الكهرباء بشكل مستمر وآمن هو اللي هيسمح بتشغيل آلاف الطلمبات والآلات الزراعية في وقت واحد، وده معناه استصلاح أراضي أكتر وزراعة محاصيل أكتر وتوسع حقيقي في الإنتاج المحلي.
وبكده مصر بتأكد إنها ماشية بخطة واضحة لتأمين الطاقة والغذاء في وقت واحد، وبتحول الصحرا إلى واحات خضراء مدعومة بشبكة كهرباء حديثة ومستقرة.
