مشروع ضخم في قناة السويس.. 2 مليار دولار هيدخلوا البلد وآلاف فرص العمل
يا ترى ايه حكاية مجمع البتروكيماويات اللى هيتم تنفيذه في قناة السويس؟ وايه حجم التمويل اللى هيتم ضخه فى المشروع الضخم ده ؟ وإيه اللي يخلي منطقة زي العين السخنة تبقى موطن لمجمع بتروكيماويات باستثمارات مليارات؟
القصة باختصار هيئة قناة السويس وقّعت شراكة استراتيجية مع شركة “أنكوراج للاستثمارات” علشان ينشئوا مجمع صناعي ضخم للبتروكيماويات على أرض مملوكة للهيئة في العين السخنة جوه المنطقة الاقتصادية لقناة السويس شمال غرب خليج السويس.
المجمع ده في المرحلة الأولى هيشتغل على إنتاج مادة “البولي بروبيلين” وده منتج بيدخل في كل حاجة حوالينا من قطع سيارات لعلب تعبئة وتغليف لأجهزة كهربائية، يعني عليه طلب عالمي ضخم.. والمصدر الأساسي للبولي بروبيلين هيكون خام البروبان ومعاه هيطلع منتج ثانوي مهم… “الهيدروجين” سوقه العالمي بيكبر بشكل مرعب مع تحولات الطاقة النظيفة.
المرحلة الأولى لوحدها استثماراتها أكتر من 2 مليار دولار… والمرحلة التانية هتزود إنتاج بتروكيماويات تانية وكمان مصانع تكميلية معتمدة على التصدير بإجمالي استثمارات متوقعة تقارب 4.5 مليار دولار.
طب إيه المكاسب اللي هتيجي؟
المشروع بعد تشغيله هيوفر أكتر من 2500 فرصة عمل مباشرة وغير مباشرة.. وفي نفس الوقت شركات التشغيل هتطبق برامج تدريب فنية وإدارية متخصصة في السلامة والجودة علشان ترفع كفاءة العمالة وده معناه إن المشروع مش بس بيخلق شغل… ده بينقل مستوى الصناعة.
الفريق أسامة ربيع رئيس هيئة قناة السويس قال إن الهدف الأساسي إن الهيئة ما تعيشش على رسوم العبور لوحدها… لأ، تفتح ذراع تاني: مشروعات صناعية تحقق عوائد بالدولار وتبني مصدر دخل مستدام وده جزء من إستراتيجية صريحة هدفها تعظيم الاستفادة من أصول هيئة القناة وتنويع الأنشطة وتحقيق قيمة مضافة، مع تقليل فاتورة واردات البتروكيماويات اللي كانت مصر بتدفع فيها دولارات، وفي نفس الوقت دعم الصادرات علشان يدخل دولار بدل ما يخرج.
من الناحية التانية أحمد محرم لمدير العام لشركة أنكوراج وضّح إن الشراكة دي مش صفقة لمرة واحدة… دي رؤية طويلة الأجل لبناء صناعة عالمية المستوى موجهة للتصدير ومتماشية مع التحولات الدولية في الطاقة والقطاع الصناعي.
وقال إن المنطقة دي اللى هي مجمع أنكور ما هي إلا المرحلة الأولى من رؤية أكبر للنمو في الصناعات الكيماوية المتقدمة المعتمدة على الاستدامة والتصدير.
الفكرة ان قناة السويس مش مجرد “ممر”…قناة السويس بتتحول لـ “مورد إنتاجي” .. المشروع ده لو نجح هيخلق سلسلة مشروعات تانية متتالية… وممكن يقلب شكل المنطقة الاقتصادية بالكامل لمركز صناعات عالمية تصديرها مرتبط مباشرة بالبحر والموانئ.
