خطة مصرية لتنمية صادرات النباتات الطبية والعطرية.. استهداف 250 ألف فدان بحلول 2030 ودعم سلاسل القيمة المضافة
مصر داخلة بقوة في سباق جديد علشان تبقى من أكبر دول العالم في تصدير النباتات الطبية والعطرية.
القطاع ده دلوقتي بيمثل حوالي 17٪ من الصادرات الزراعية، وبيتزرع على مساحة حوالي 130 ألف فدان في محافظات زي بني سويف والفيوم والمنيا، والوزارة ناوية تزود المساحة دي لـ 250 ألف فدان قبل سنة 2030.
النباتات دي ليها قيمة كبيرة، لأنها بتدخل في صناعة الدوا والأكل ومستحضرات التجميل، وكمان بتفتح مجالات شغل جديدة للشباب في الريف.
علشان كده وزارة الزراعة بدأت تطبق خطة كبيرة مع المجلس التصديري للحاصلات الزراعية، علشان تزود الصادرات وتخلي المنتج المصري ينافس بقوة برا مصر.
اللي يمكن ناس كتير ما تعرفوش إن النباتات الطبية والعطرية بقت من أهم المحاصيل اللي مصر بتركز عليها دلوقتي، لأن الطلب عليها بيزيد يوم بعد يوم في العالم كله.
ومن هنا، وزارة الزراعة قررت تبدأ خطة لتعظيم الصادرات، يعني تزود الإنتاج، وتحسن الجودة، وتفتح أسواق جديدة برا.
الدكتور علاء عزوز، رئيس قطاع الإرشاد الزراعي، قال إن النباتات دي بقت ركيزة أساسية في التنمية الزراعية، وإنها مش بس بتفيد الزراعة، لكن كمان بتخدم الصناعة، لأنها بتدخل في الأدوية، والمأكولات، ومستحضرات التجميل.
وقال كمان إن الوزارة شغالة على كذا محور مهم .. زي:
التوسع في التصنيع الزراعي، يعني مش بس نزرع ونبيع خام، لكن كمان نجهز ونجفف ونعبي المنتج بجودة عالمية.
وإطلاق علامة تجارية مصرية موحدة للنباتات الطبية والعطرية، علشان كل العالم يعرف المنتج المصري ويثق فيه.
كمان التحول الرقمي في الزراعة، عن طريق تطبيقات موبايل وأنظمة حديثة توصل المزارعين بالخبراء والمختصين بسهولة.
ونظم إنذار مبكر ومنصات رقمية تساعد الفلاحين يعرفوا الأسعار والمعلومات أول بأول.
و تمويل ميسر ودعم فني، عن طريق البنوك والمؤسسات اللي بتدي قروض سهلة للشباب والمستثمرين اللي عايزين يدخلوا المجال ده.
وكمان التحول للزراعة العضوية واستخدام أساليب حديثة توفّر المية والطاقة وتحافظ على البيئة.
واخيرا التعاون مع مراكز البحوث والجامعات علشان تطوير تقاوي جديدة مقاومة للجفاف والأمراض وتحسين جودة الإنتاج.
والخطوات دي كلها داخلة ضمن استراتيجية التنمية الزراعية المستدامة 2030، واللي شايفة إن النباتات الطبية والعطرية مش مجرد زراعة، دي فرصة اقتصادية كبيرة ممكن تخلق شغل، وتزود دخل البلد، وتدعم الأمن الغذائي والدوائي.
وفي نفس الوقت ده، انطلق مهرجان النباتات الطبية والعطرية في بني سويف تحت شعار "من مصر إلى العالم"، بمشاركة شركات ومزارعين وخبراء من كل حتة.
خلال المهرجان، اتكرم 20 مزارع متميز في الزراعة الحيوية، ضمن مبادرة :سندات الكربون"، اللي بتشجع الفلاحين يزرعوا بطريقة صديقة للبيئة وتقلل الانبعاثات الكربونية.
كمان اتعملت ندوات وجلسات علمية بتتكلم عن طرق الزراعة الحديثة، ومتطلبات التصدير، والجديد في التصنيع الزراعي.
كل ده علشان مصر تفضل دايمًا في المنافسة، مش بس بالكمية.. لكن كمان بالجودة.
وفي الآخر، الهدف واضح: النباتات الطبية والعطرية هتبقى كنز مصر الأخضر، اللي هيزود الصادرات، ويفتح فرص شغل، ويخلي العالم كله يعرف إن أرض مصر مش بس بتزرع.. دي بتنتج ذهب أخضر فعلا.
