مشروع العمر لمصر.. أمر يحدث لأول مرة من 7 سنين.. وقناة السويس راجعة بكل قوتها
ركزت وحدة أبحاث بانكير، على عدد من التقارير الاقتصادية العالمية والمحلية، خلال جولتها في أسواق المال والاعمال والشركات والطاقة حول العالم.
والبداية من مشروع مهم جدا لمصر اتكلم عنه الرئيس عبد الفتاح السيسي في لقاء مهم مع رئيس مجلس إدارة الشركة الصينية الوطنية للهندسة الكيميائية وهو مشروع كربونات الصوديوم (الصودا آش) اللى الرئيس اكد انه من المشروعات الاستراتيجية ذات الأهمية الكبرى لمصر.
وقال إن المشروع هيُسهم في دعم الاكتفاء الذاتي للصناعات المحلية وتقليل الواردات.. يعني باختصار ما هوش مشروع عادي لكن مشروع ممكن يكون ليه دور محوري في مستقبل الصناعة المصرية.
طيب، إيه بالضبط مشروع الصودا آش ده؟
الصودا آش هي كربونات الصوديوم — مادة كيميائية مهمة جدًا تدخل في صناعات الزجاج، المنظفات، الورق، وحتى الصناعات الدوائية والكيميائية.. المشروع اللي مصر بتخططه هو إقامة مجمع لإنتاج الصودا آش ومشتقاتها بمنطقة العلمين الجديدة بطاقة تصميمية حوالي 600 ألف طن سنويا.
الميزة إن المشروع مش للاستهلاك المحلي بس، الهدف إنه لو فيه فائض يُصدّر، وكمان يقلل فاتورة الاستيراد الكبيرة اللي كانت مصر بتتحمّلها من الصودا آش.
وليه المشروع ده مهم لدرجة إنه يُصنّف استراتيجية كبرى؟
أولا لأن المواد الخام اللي يحتاجها مشروع الصودا آش — زي الملح والحجر الجيري — موجودة في مصر، مما يقلل تكلفة الاستيراد.. وثانيا لأن الصناعات اللي بتستخدم الصودا آش — الزجاج، المنظفات، الورق — مهمة جدًا للاقتصاد، وأي زيادة في إنتاجها يعني قيمة مضافة أكبر للصناعات المرتبطة.. وتالت حاجة لتأمين الصناعة من أي تقلبات في الأسواق العالمية والأسعار، وعدم الاعتماد بشكل كبير على الاستيراد كمان المشروع هيوفر فرص عمل مباشرة وغير مباشرة ويساهم في تنمية المدن اللي هيبقى فيها المشروع.
ومن الصودا آش نروح لموضوع مهم جدا.. وكالة ستاندرد أند بورز — واحدة من أهم وكالات التصنيف الائتماني في العالم — أعلنت إنها رفعت تصنيف مصر من "B-" إلى "B"، مع نظرة مستقبلية مستقرة.. وده أول رفع من نوعه من سنة ٢٠١٨ تقريبًا، يعني من أكتر من سبع سنين.
التصنيف الائتماني ده كأنه "شهادة سمعة مالية" للدول .. بيقول للمستثمرين البلد دي آمنة ولا لأ، تقدر تقرضها أو تستثمر فيها ولا تخاف.. ولما التصنيف يعلى، ده معناه إن مستوى الثقة في الاقتصاد بيرتفع، وإن المستثمرين ممكن يدخلوا بأموالهم وهم مطمنين أكتر.
الوكالة قالت إن فيه إصلاحات اقتصادية مستمرة في مصر بدأت تجيب نتيجة فعلية.. الاقتصاد بينتعش، الناتج المحلي بيكبر، والسياحة زادت ٢٠٪ في الربع اللي فات.. وكمان تحويلات المصريين من الخارج طلعت بنسبة ٣٦.٥٪.
الوكالة كمان أشادت بالخطوات اللي مصر خدتْها في تحرير نظام الصرف الأجنبي.. وقالت إن الالتزام بسياسة سعر صرف مرن هو خطوة مهمة لدعم النمو واستقرار السوق خلال السنين الجاية.
وحدة أبحاث بانكير ألقت الضوء على موضوع في غاية الأهمية بخصوص قناة السويس.. وكشفت ان الأخبار الجاية من البحر الأحمر مبشّرة جدًا.. وبعد فترة توتر طويلة في الشرق الأوسط، خصوصًا حوالين باب المندب، الأوضاع بدأت تهدى تدريجيًا… والنتيجة ان عدد السفن اللي بتعدي من المضيق رجع يرتفع بشكل ضخم من حوالي ٣٠ سفينة في اليوم، لـ ٨٠ سفينة يوميًا.. وده مش رقم بسيط.. ده معناه إن المرور التجاري رجع لطبيعته وإن قناة السويس بتستعيد نشاطها بكامل طاقتها بعد أكتر من سنتين كانت فيها الحركة متأثرة بالأحداث الإقليمية.
اللي حصل كمان إن أسهم شركات الشحن العالمية بدأت تتحرك لفوق بعد الأخبار دي لأن العالم فهم إن الممر الملاحي الأهم في المنطقة بيرجع يشتغل بكامل قوته.. وده في حد ذاته رسالة طمأنينة كبيرة للأسواق إن التجارة راجعة، وإن الاضطراب اللي كان حاصل في البحر الأحمر بدأ يختفي.
وحدة أبحاث بانكير كشف كمان عن تحركات مهمة لعدد من أكبر البنوك المصرية مع بدء رفع الرسوم الإدارية والعمولات على شوية خدمات مصرفية أساسية.. زي فتح الحسابات وإصدار وتجديد الكروت البنكية.. وكمان المصاريف الربع سنوية اللي بتتخصم من الحساب.
الزيادات دي مش بسيطة.. تراوحت بين 25 و75 جنيه في معظم الحالات، والبداية كانت من البنك الأهلي المصري وبنك مصر — الاتنين الكبار اللي دايمًا بيمهدوا الطريق لباقي السوق.
مثلاً البنك الأهلي رفع المصروفات الإدارية على الحسابات الربع سنوية لـ 75 جنيه بدل 50 في الحسابات العادية.. ولو حسابك متوسط بين 700 ألف و2 مليون الرسوم وصلت لـ 100 جنيه.. أما كبار العملاء اللي حساباتهم بين 2 و20 مليون جنيه بقت 125 جنيه.
وكمان كشف الحساب الورقي السنوي بقى بـ 100 جنيه بدل 75.. وتجديد الكروت بقى بـ 125 جنيه بدل 100 ولو كارت جولد، يبقى بـ 150 جنيه.
نفس الاتجاه بنك مصر ماشي عليه..ضاعف مصاريف كشف الحساب من 75 لـ150 جنيه.. ورفع الرسوم الإدارية الربع سنوية بين 75 و125 جنيه حسب نوع الحساب، وكمان زوّد عمولة الحد الأدنى للرصيد لـ 30 جنيه بدل 10.
