بحيرات باريس.. الصحراء تتحول لمنطقة استثمارية.. تجمع بين الثروة السمكية والزراعية والسياحة
هتتحول الصحراء لمنطقة استثمارية خضراء هتدخل ملايين الدولارات للبلد كل سنة.
فيها كل اللي تتخيله ومتتخيلهوش من اول الثروة السمكية اللي هتوفر حوالي 500 طن سمك في السنة الواحدة.. لحد الزراعة وفرص العمل اللي هتوفرها لشباب كتير.
أما السياح فـ هيجولها من كل مكان.. يا ترى ايه اللي بيحصل في صحراء مصر وهل فعلا هتتحول لمكان سياحي.. تعالوا نعرف ايه الحكاية؟
في الوقت اللي الدولة بتحاول تستفيد من كل شبر في أرضها.. مصر فتحت كنز حقيقي في قلب الصحرا اسمه بحيرات باريس وده مش مشروع على الورق ده مشروع استثماري ضخم بيحصل على الأرض حرفيا.
بحيرات باريس موجودة على بُعد 300 كيلو جنوب مدينة باريس في الوادي الجديد وبتغطي مساحة ألف كيلومتر مربع.
جوه المنطقة دي فيه 3 بحيرات كبار جدا و فيها حوالي 56 مليار متر مكعب مياه عذبة كانت متسابة من غير اي تطوير اوي استغلال بس المشروع ده قلب كل الموازين.
طيب وده هنستفاد منه ايه وليه مهم اوي كدا؟
عدد معايا يا سيدي.. اول حاجة هيفيدنا بيها كانت في الأسماك وفي حوالي مليون زريعة بلطي نِضيف اتزرعت من أحسن الأنواع والإنتاج المتوقع من البحيرات دي يوصل لـ 500 طن سمك كل سنة واللي حلو أكتر إن السمك ده بيتباع في المنافذ الحكومية بـ 25 جنيه للكيلو يعني بروتين نضيف بسعر بسيط والمواطن يستفيد والصياد يشتغل ويكسب.
الدولة كمان بتكسب لأننا بنقلل الاستيراد وبنشتغل من مواردنا اللي كانت ضايعة وبكده خلقنا دخل ثابت لأهالي المنطقة وفرص شغل كتير سواء صيادين أو عاملين في النقل أو التعبئة أو التوزيع
ندخل بقى على الزراعة المشروع بيستهدف استصلاح 280 ألف فدان بالتمام والكمال بالتعاون مع هيئة قناة السويس وبمشاركة قطرية واستثمارات وصلت لـ مليار ونص دولار.
وده رقم مش بسيط ده مشروع زراعي ضخم هيغير خريطة الوادي الجديد بالكامل إحنا بنتكلم عن محاصيل استراتيجية... يعني أمن غذائي يعني اكتفاء ذاتي يعني عملة صعبة بنوفرها وبنقلل الاستيراد.
كمان المحافظة وفرت التقاوي بأسعار قليلة وسمحت بزراعة الرو حوالين البحيرات كمرحلة تجريبية لمدة سنة وفعلاً الرز نجح وحقق إنتاجية عالية لأن الأرض والمناخ هناك ممتازين
من ناحية تانية البنية التحتية اللي اتعملت من محطات رفع وتمهيد طرق وتبطين قنوات ري وتجهيزات خلت المنطقة جاهزة لأي مستثمر جاد يخش يشتغل على طول من غير ما يبدأ من الصفر كل ده بيتم بخطة واضحة ومستدامة علشان نضمن إن المشروع يفضل شغال بكفاءة على طول مش مجرد فورة وتخلص.
كمان المحافظة بدأت تشجع السياحة.. والمنطقة بقت مقصد لرحلات السفاري واليوم الواحد واتعمل هناك منتجع ومصيف وخدمات سياحية كاملة وده فتح باب جديد للدخل وفرص شغل كمان في قطاع السياحة.
يعني المكان بقى فيه إنتاج سمكي وزراعي وسياحة وفي نفس الوقت بيخدم الأمن الغذائي وبيوفر فرص شغل ومصدر دخل حقيقي للناس على الأرض مفيش حاجة اسمها مشروع واحد بحيرات باريس دلوقتي نموذج لمشروع متكامل استثمار على مستوى عالي نابع من قلب الصحراء وبيحط اسم الوادي الجديد على خريطة التنمية الاقتصادية في مصر.
