خدمات لوجستية وصيانة ونقل نفايات ومنطقة اقتصادية ضخمة.. خطة السيسي لتعويض انخفاض إيرادات قناة السويس
الدولة ناوية تعوض خسائر قناة السويس وهتحقق ارقام عمرها ما حصلت في التاريخ.. ياتري ده هيحصل ازاي.. واية هيا خطة مصر لزيادة إيرادات القناة.. والدولة مستهدفة تحقق إيرادات توصل لكام.
علي مدار ما يقرب من سنتين حاليا، أهم وأكبر مصدر للدخل الدولاري في مصر بيحقق خسائر كبيرة جدا وكمان بالدولار، وهيا قناة السويس واللي كانت عبارة عن فرخة بتبض ذهب في الناتج القومي المصري علي مدار كل السنين اللي فاتت، ولكن التوترات الجيوسياسية اللي حصلت في منطقة الشرق وتحديدا من اكتوبر 2023 اثرت بشكل سلبي جدا علي إيرادات القناة.
الخسائر اللي حققتها القناة على مدار السنين اللي فاتوا واللي وصلت لأكثر من 70% من إجمالي الارقام اللي كانت بتحققها القناة علي مدار السنين اللي فاتت وبالارقام وصلت خسائر القناة لحوالي 7 مليار دولار، لكن الدولة متوقفتش تتفرج ولا شالت أيدها وقالت لما حركة الملاحة ترجع لشكلها وحالتها الطبيعية يبقي يحلها ربنا، لا ده عملت شغل كتير جدا علي طول الخط الملاحي لمجري القناة، علشان أول ما المنيا تضبط نكون جاهزين لانطلاقة قوية ونحقق إيرادات اعلي من اللي كانت بتتحقق في السنين اللي فاتت ونعوض الخسائر كلها.
طيب اية اللي بتعمله الدولة علشان نعوض خسائر إيرادات قناة السويس ؟.
في حاجات كتيرة عملتها الدولة استعدادا لعودة حركة الملاحة بشكل طبيعي واللي متوقع يكون في وقت قريب قوي وده بهدف تعويض خسائر السنتين اللي فاتوا اول الحاجات دي هيا الاعتماد علي خطط تحفيز الخطوط الكبيرة واللي بتتضمن طرح خصومات وعروض للسفن الكبيرة علشان تكون القناة خيار اقتصادي أفضل من الطريق البديل عن طريق رأس الرجاء الصالح، ده غير تحديث خدمات الرسو والمراسي وتنظيم التعريفة، وحاليا بقي فيه نظام جديد لتوحيد رسوم المراسي عشان يسهل الإجراءات ويقلل تكاليف التشغيل على السفن، وده بيساعد على تبسيط المرور ويشجع الشركات ترجع تعبر من خلال القناة.
الفترة اللي فاتت الدولة اشتغلت بشكل كبير جدا علي تطوير المنطقة الاقتصادية لقناة السويس وتحويلها لمركز لوجيستي وصناعي، عشان الشركات تفتح مصانع ومراكز لوجستية جنب القناة، وده بيخلي قيمة الخدمات اللي بتتقدم للسفن مش بس عبور، لكن خدمات لوجستية متكاملة قبل وبعد العبور، ده غير خدمات اللوجستية الجديدة اللي بدأت القناة تقدمها للسفن وقت العبور، زي خدمة إدارة نفايات السفن، وخدمات الصيانة السريعة وتوفير تزويد بالوقود في وقت العبور، ده غير فتح مراكز ابتكار وتدريب لرفع كفاءة الخدمات البحرية المحلية، والحاجات دي بتخلي القناة تقدم قيمة مضافة ومصدر دخل جديد غير رسوم العبور .
الدولة كمان استغلت بشكل كويس جدا علي تحسين العمليات الملاحية والأمنية، وتطوير قواعد الملاحة،وتحسين خدمات الطوافة والقيادة، ونظمت القوافل الشمالية والجنوبية عشان نعظم طاقة استيعاب القناة وترجع عدد السفن اليومي لطبيعته بعد الانخفاض، وكل ده هدفه تعويض جزء كبير من الإيرادات اللي خسرتها القناة عن طريق جذب خطوط ملاحية كبيرة وتقديم حزم خدمات بيكون لها دخل متكرر من الخدمات اللوجستية وخدمات نقل النفايات والامداد والتزود بالوقود وخدمات الصيانة.
