كنز مصر المدفون تحت رمال الصحراء الغربية.. خطة السيسي لتحويل مصر لمركز إقليمي لصناعة السيارات.. أسرار سيل الاستثمارات الخليجية على السوق المصري
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن كنز مصر المدفون تحت رمال الصحراء الغربية.
كشف التقرير، أن وزارة البترول أعلنت عن كشف جديد في الصحراء الغربية، في البئر الاستكشافي شمال لوتس العميق-1 اللي تبع شركة عجيبة للبترول، باستثمارات من شركة إيني الإيطالية..الكشف ده لوحده بيدي 1835 برميل بترول خام يوميًا، ومعاهم 7 مليون قدم مكعب غاز، يعني ما يعادل حوالي 3100 برميل مكافئ، والأهم إنه خلاص دخل فعليًا على خريطة الإنتاج، واحتياطياته بتتقدر بحوالي 5 مليون برميل مكافئ.
ده مش مجرد كشف عادي، ده بيأكد إن الصحراء الغربية لسه مليانة أسرار وفرص بترولية وغازية، وإنها منطقة جاذبة جدًا للاستثمارات.. واللي يزود قيمة الكشف الجديد إن قبلها شركة عجيبة وإيني نجحوا في قصة تانية مثيرة في حقل شمال روزا، لما قدروا يوصلوا لطبقة "المساجد العميقة" على عمق أكتر من 11 ألف قدم، والطبقة دي كان إنتاجها ضعيف جدًا بالطرق التقليدية، لكن بالتكنولوجيا الجديدة للحفر الأفقي الإنتاجية زادت 6 أضعاف! يعني بقوا يطلعوا حوالي 7 مليون قدم مكعب غاز يوميًا ومعاهم 550 برميل زيت مكافئ، إنجاز فعلي بيغير قواعد اللعبة في الصحراء الغربية.
وأوضح التقرير، أن رئيس شركة عجيبة، أكد أن استثمارات السنة دي وصلت لـ 404 ملايين دولار، والإنتاج مستقر بمتوسط أكتر من 26 ألف برميل زيت خام يوميًا، ومعاهم حوالي 77 مليون قدم مكعب غاز، يعني إجمالي بيقرب من 40 ألف برميل زيت مكافئ يوميًا، ده غير إنهم حفروا 28 بئر إنتاجي وكمان بئرين استكشافيين، وبدأوا يشغلوا محطة جديدة لإعادة معالجة وضخ المياه المصاحبة في الخزانات اللي شغالة، ودي خطوة بيئية محترمة جدًا.
منصات بانكير قدمت تقرير مختلف النهاردة عن خطة السيسي لتحويل مصر لمركز إقليمي لصناعة السيارات.
قال التقرير، إن الدولة وافقت علي بدء صناعة سيارات الميني فان 7 راكب في المدن الجديدة، ودي نوعية جديدة من السيارات اللي الدولة بتستهدف التوسع فيها، خصوصا أن مصر عندها خطة انها تتحول لمركز إقليمي في صناعة السيارات وتسيطر علي عرش افريقيا والشرق الأوسط وتكسر الرقم القياسي اللي مسجلاه دولة المغرب واللي بتعد اكبر دولة في قارة أفريقيا في صناعة السيارات.
وأضاف تقرير بانكير، أن مصر بتهدف أنها تكون المصدر الأول لصناعة وتصدير السيارات في إفريقيا والشرق الأوسط، أنها تتفوق على دول المغرب واللي بتعد حاليا الرائد في المنطقة من حيث الإنتاج والتصدير، وعلشان نوصل النقطة دي الدولة خطت استراتيجية وطنية لصناعة السيارات لتحويل القاهرة لمركز إقليمي، وده بيحصل من خلال توطين الصناعة وتنويع المنتجات، خصوصا المركبات الكهربائية والنقل المستدام .
وكشف تقرير بانكير، أن مصر حاليا بتستهدف الوصول إلى طاقة إنتاجية سنوية من السيارات هتترواح من 400 إلى 500 الف سيارة في 2030، وهيكون نص الكمية المستهدفة مخصص للتصدير، وعلشان نوصل لتحقيق الإنتاج المستهدف الحكومة قدمت تحفيزات كبيرة لدخول استثمارات في قطاع صناعة السيارات في مصر وصلت لأكثر من 630 مليون دولار من شركات زي جي.بي أوتو ونيسان وجاك والمنصور والقصراوي، وحاليا الإنتاج المحلي بيتراوح ما بين 950 الف الي 100 الف سيارة سنويا .
وحدة أبحاث بانكير قدمت تقرير خاص النهاردة عن أسرار سيل الاستثمارات الخليجية علي السوق المصري.
كشف التقرير، السر المخفي وراء اهتمام دول الخليج بالاستثمار في المناطق الساحلية المصرية.. واللي منها صفقة الاستثمار السياحي اللي مصر وقعتها مع دولة الإمارات واللي وصلت العائدات المباشرة منها ل 35 مليار دولار كعائدات مباشرة في الاقتصاد المصري، والصفقة دي كان لها عامل السحر في النهضة الحقيقة اللي موجود عليها الاقتصاد المصري حاليا وهيا الاساس في التحسن اللي وصل له سعر صرف الجنية المصري قدام الدولار، ولولا الصفقة دي كانت الاقتصاد المصري هيكون في مكانة للاسف هتكون صعبة جدا خصوصا أن مصر قبل توقيع الصفقة دي كانت بتعاني من نقص شديد من العملات الأجنبية في البنوك .
وكشف تقرير بانكير، أن الصفقة اللي وقعتها مصر مع الإمارات فتحت نفس دول الخليج علي الدخول والاستثمار في السوق المصري، خصوصا أن مصر عندها قائمة باكثر من 7 من مواقع استراتيجية متوقع طرحهم قدام الاستثمارات الخارجية اهمهم رأس بنأس، وغيرها من المناطق المهمة جدا واللي دخلها في خريطة الاستثمار هيحولها لمناطق سياحية واقتصادية من طراز فريد .
وأوضح التقرير، أن دول الخليج دايما بتنمي محفظتها في العقار والسياحة بمصر، خصوصا في منطقة الساحل الشمالي واللي تحولت لواحدة من أهم الكنوز اللي موجودة في مصر واللي بقت عليها العين في الاستثمارات السياحية الوافدة من الخروج بسبب طقس الجميل وارضها الممتازة ده غير أنها قريبة جدا من القاهرة.. كمان مصر بتعتبر وجهة سياحة جذابة، والاستثمار في المنتجعات والفنادق بيقدم عوائد مستقرة وسريعة.
