الصيف الأصعب في تاريخ البلد.. كيف نجت مصر من كابوس الظلام الشامل؟
موسم هو الاصعب علي الاطلاق وكان في تحديات كبيرة جدا في توفير التغذية الكهربائية للمواطنين.. ياتري ازاي الدولة عدت التحدي ده.. واية هيا الوسائل اللي اعتمدت عليها الدولة علشان تخطي التحدي ده.
الكهرباء واحدة من العناصر الأساسية لاي اقتصاد في العالم خصوصا أن مفيش مستثمر هيروح يبني ويرمي استثمارات في أي دولة في العالم وهيا عنده أزمة في الكهرباء ومش قادر توفر التغذية المطلوبة لشعبها، علشان كده الدولة كان عندها هدف رئيسي هو تأمين التغذية الكهربائية للشعب والأنشطة الاقتصادية علي كل الاحمال، وده اللي الدولة بدأت تشتغل عليه من فترات بعيدة جدا علشان نوصل في النهاية بموسم صيف بلا تخفيف أحمال ولا قطع كهرباء.
طيب إزاي الحكومة عدت من تحدي توفير التغذية الكهربائية للأنشطة الاقتصادية في مصر ؟.
الاستعدادات اللي قامت بيها الحكومة علي مدار الشهور اللي فاتت وتحديدا خلال فصل الشتاء، كانت مليانة شغل والحكومة خصصت تمويل كبير لاستقرار الشبكة القومية للكهرباء واننا نتجنب العودة لتخفيف الأحمال، بالتنسيق بين وزارة الكهرباء والطاقة المتجددة ووزارة البترول.
الاستعدادات الحكومية لفصل الصيف تمنت اعتماد خطة عاجلة لإضافة من 3 إلى 4 آلاف ميجاوات من الطاقة المتجددة بتكلفة وصلت لأكثر من 4 مليارات دولار، والإضافات الجديدة ساعدت مصر في تجنب العودة لتطبيق خطة تخفيف الأحمال، ده غير الاتفاقيات اللي وقعتها الحكومة لإنشاء محطة رياح بقدرة 500 ميجاوات في خليج السويس باستثمارات وصلت لأكثر من 600 مليون دولار .
في نقطة مهمة كمان في خطة الدولة لتوفير التغذية الكهربائية لكل الاستخدامات هيا مشروع الربط الكهربائي اللي بيتعمل مصر مع السعودية واللي خلال أيام قليلة جدا هنعلن عن تشغيل المرحلة الأولى منه واللي هتكون بقدرة 1500 ميجاوات، وخلال شهور قليلة جدا من تشغيل المرحلة الأولي هنعلن عن تشغيل المرحلة الثانية واللي هتكون بقدرة 1500 ميجاوات، وبكده هتكون إجمالي القدرات اللي هتضيفها مصر للشبكة هتوصل ل 3000 ميجاوات قبل نهاية 2025، والتحركات دي كلها هدفها دعم وتقوية وتوفير التغذية الكهربائية اللازمة للمواطنين وقطاع الصناعة وتقليل الاعتماد على الوقود الأحفوري.
طيب إزاي الحكومة بتتوسع في خطة زيادة إنتاجية الطاقات المتجددة علي الشبكة الموحدة للكهرباء ؟.
الفترة اللي فاتت الحكومة اخذت خطوة مهمة جدا وهيا تعديل التشريعات الخاصة بقطاع الكهرباء، وبقي عندنا قانون جديد للكهرباء بيعظم دور القطاع الخاص ومشاركته في المشروعات الجديدة لإنتاج وتوليد الكهرباء من الطاقات الجديدة والمتجددة، وحاليا مصر بقت هدف رئيسي للمستثمرين للدخول في مجالات إنتاج الكهرباء من مصادر الطاقة المتجددة، خصوصا بعد قرار الدولة برفع تقديراتها لقيمة شراء الطاقة الكهربائية المنتجة من الشمس والرياح إلى 18.15 مليار جنيه في العام المالي الحالي 2025-2026، ونسب الزيادة هتتجاوز 10% بما يوازي 1.65 مليار جنيه .
خلال الشهور اللي فاتت وزارة الكهرباء المصرية اشترت طاقة كهربائية من الشمس والرياح بقيمة تعدت 16.5 مليار جنيه خلال العام المالي اللي فاتت 2024/2025، من شركات قطاع خاص، وعمليات الشراء تمت من جانب الشركة المصرية لنقل الكهرباء وهيا المنوط بيها شراء الكهرباء من المستثمرين ومشروعات الرياح والطاقة الشمسية .
