شركات يابانية تقتحم السوق المصري.. شوف هتشتغل في إيه ومدى الاستفادة الاقتصادية
يا ترى إيه حكاية دخول الشركات اليابانية للسوق المصري، هل بيفكروا يشتغلوا عندنا وهيشتفلوا ف إيه بالظبط، وإيه حجم الاستفادة الاقتصادية اللي ممكن ترجع على البلد؟
في الحقيقة، الشركات اليابانية داخلة بقوة للسوق المصري، والحكاية بدأت لما الدكتور مصطفى مدبولي رئيس مجلس الوزراء شهد توقيع اتفاقيتين مهمين جدا بين مجموعة العربي وشركات يابانية كبيرة، وده كان على هامش مؤتمر طوكيو الدولي للتنمية في إفريقيا "تيكاد 9"، وكمان خلال فعاليات منتدى الاستثمار الياباني المصري.
والاتفاقية الأولى كانت بين مجموعة العربي وخبراء يابانيين لتأسيس شركة جديدة اسمها كاچيتو كوربوريشن، والشركة دي هدفها نقل التكنولوجيا اليابانية لمصر وكمان تصميم وتطوير وتصنيع الأجهزة الإلكترونية والمنزلية، وده معناه إننا ممكن نشوف منتجات متطورة بجودة عالية ومصنوعة محليا تقدر تنافس جوه مصر وكمان بره في أسواق إقليمية وعالمية.
أما الاتفاقية التانية، فكانت بين كاچيتو كوربوريشن وواحدة من أعرق الشركات اليابانية في الصوتيات والمرئيات وهي أونكيو، والتعاون ده هيخلينا نشوف أجهزة جديدة بجودة وتكنولوجيا يابانية متقدمة جدا، واللي هيرفع اسم الصناعة المصرية قدام العالم.
ومن هنا، قال رئيس الوزراء ان الاتفاقيات دي مش مجرد توقيع ورق لكن بداية لشراكات استراتيجية قوية بتبين قد إيه اليابان واثقة في قوة الاقتصاد المصري، وإن مصر بقت وجهة جاذبة للاستثمارات التكنولوجية والصناعية.
أما المكاسب الاقتصادية بقى، فهي كتير جدا، اولها نقل وتوطين التكنولوجيا اليابانية جوه مصر، وفرص شغل جديدة للشباب، وكمان رفع تنافسية الصناعة المصرية عالميا وكمان تعزيز مكانة مصر كمركز صناعي إقليمي مهم.
يعني باختصار، دخول الشركات اليابانية للسوق المصري مش بس صفقة اقتصادية، ده كمان نقلة نوعية ممكن تخلي مصر لاعب أكبر في سوق الصناعات الإلكترونية والتكنولوجية وده كله بيخدم رؤية مصر 2030 للتنمية المستدامة.
ومن الناحية التانية، المهندس إبراهيم العربي، رئيس مجلس إدارة مجموعة العربي، قال إن التعاون مع اليابانيين خطوة مهمة جدا لأن المستهلك المصري بيدور على الجودة العالية والتكنولوجيا المتطورة، واليابان معروفة عالميا بالسمعة دي، وده معناه إن المنتجات الجديدة هتلاقي قبول كبير في السوق المصري والعربي.
كمان، وجود منتدى الاستثمار الياباني المصري نفسه بقى منصة قوية لفتح مجالات تعاون جديدة، مش بس في الإلكترونيات لكن كمان ممكن نشوف دخول اليابانيين في قطاعات زي الطاقة المتجددة والنقل الذكي والصناعات الثقيلة، وده بيفتح باب إن مصر تتحول لمركز صناعي ضخم يخدم إفريقيا والشرق الأوسط.
