مشروع جديد بالمنطقة الاقتصادية لقناة السويس.. اعرف التفاصيل
يا ترى إيه الجديد في المنطقة الاقتصادية لقناة السويس، وإزاي مشروع في صناعة المنسوجات ممكن يبقى خطوة كبيرة في دعم الاقتصاد المصري، وإزاي هنستفيد منها اقتصاديا؟
في الساعات الأخيرة، الهيئة العامة للمنطقة الاقتصادية لقناة السويس برئاسة وليد جمال الدين، وقعت عقد جديد مع شركة "CWA" المصرية علشان تنشئ مصنع ضخم للمنسوجات في منطقة السخنة الصناعية، باستثمارات بتوصل ل970 مليون جنيه، يعني حوالي 19.9 مليون دولار، والتمويل كله ذاتي من الشركة نفسها وعلى مراحل.
والمصنع ده هيتبني على مساحة 15 ألف متر مربع، والتشغيل الفعلي متوقع يبدأ في الربع التالت من 2026، والمشروع في مرحلته الأولى هيوفر حوالي 200 فرصة عمل مباشرة، ومع خطط التوسع ممكن نوصل ل 500 فرصة خلال 5 سنين.
طب ليه المشروع ده مهم؟
لأنه مش مجرد مصنع، ده خطوة جديدة في تعميق الصناعة المحلية وتقليل الاعتماد على الاستيراد في قطاع مهم زي الغزل والنسيج، وكمان هيخدم صناعات تانية زي الملابس والمفروشات.
وفي فايدة تانية، وهي ان المصنع مش هيكتفي بالسوق المحلي، ده عنده خطة تصدير طموحة جدا، وهي انه بيستهدف يوصل بصادراته ل10 مليون دولار في أول سنة، وتزيد تدريجيا ل 30 مليون دولار خلال خمس سنين، يعني مش بس هيخلق شغل، لأ ده كمان هيجيب عملة صعبة للبلد.
ومن التصريحات المهمة كمان، رئيس الهيئة قال إن البنية التحتية المتكاملة والموقع الاستراتيجي وكمان التكامل بين المواني والمناطق الصناعية في المنطقة الاقتصادية، بقت عناصر جذب قوية لأي مستثمر جاد، وده اللي فعلا بيحصل.
أما مدير شركة CWA، فأكد إن المشروع ده جزء من استراتيجية الشركة علشان تقدم منتج مصري عالي الجودة للأسواق العالمية، مع التزام تام بأعلى معايير الجودة والتطوير المستمر.
واللي بيأكد أهمية الخطوة دي كمان، إن الهيئة بتركّز في خطتها الاستراتيجية على قطاعات صناعية واعدة زي النسيج، لإنها بتخلق فرص عمل وبتدعم سلسلة الإمداد لصناعات تانية، وكمان فيها إمكانيات تصدير ضخمة.
والخلاصة، هي ان المشروع ده مش بس استثمار ب970 مليون جنيه، ده رسالة واضحة إن المنطقة الاقتصادية لقناة السويس بقت أرض خصبة للصناعة والاستثمار، ومصر بتتحرك بخطى ثابتة نحو تمكين الصناعات الوطنية وربطها بالسوق العالمي.
