مفاجآت في سوق الذهب عالميا ومحليا.. خطة السيسي لتحويل مصر لمركز إقليمي لتبادل الطاقة.. مصر تبحث عن كنز الفوسفات المدفون تحت الأرض
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن توقعات أسعار الذهب الفترة الجاية.
التقرير قال إنه في الساعات الأخيرة أسعار الدهب سواء عالميا أو محليا شهدت ارتفاع طفيف، وسجلت الاونصة ارتفاع بنسبة 0.3%، وصل بيه لمستوى 3350 دولار، لكن ده مش معناه إن الدهب طاير، بالعكس، الأسبوع اللي فات كان في تذبذب وتحركات جانبية بسبب حالة عدم اليقين في الأسواق، خاصة حوالين موضوع الفايدة الأمريكية والتعريفات الجمركية اللي ترامب بيلوح بيها على المكسيك وأوروبا ودول تانية كتير.
وأضاف التقرير، أن مؤشر الدولار نزل شوية، بس على مدار الأسبوع كان قوي، خاصة بعد صدور بيانات مبيعات التجزئة الأمريكية اللي طلعت أقوى من التوقعات، وده خلا المستثمرين يرجعوا للدولار، ويقللوا الطلب على الدهب كملاذ آمن، وطبعا لما الدولار يعلى الدهب بيتأثر بشكل سلبي فبينزل، لأن العلاقة بين الاتنين عكسية.
وأشار التقرير إلى أن توقعات الأسعار الفترة الجاية، أن الدهب هيفضل في نفس النطاق المحدود لو استمر الدولار قوي، خاصة إن الفيدرالي لسه مش ناوي يخفض الفايدة قريب، أما بقى محليا او عندنا في مصر، فدي حاجة هتتحدد بحركتين، وهي سعر أونصة الدهب العالمي، وكمان سعر صرف الدولار مقابل الجنيه، يعني لو حصل أي تحرك كبير في الاتنين دول، ساعتها ممكن نشوف قفزات أو هبوط واضح في الأسعار.
منصات بانكير قدمت تقرير مختلف النهاردة عن خطة السيسي لتحويل مصر لمركز إقليمي لتبادل الطاقة.
كشف التقرير، أن الثورة الصناعية اللي موجودة في أغلب دول العالم واللي معاها كل الدول بتحاول تعمل وتأسس بنية تحتية لاستقبال وتشغيل كل انواع الصناعات وأنها تتحول لدول عندها اكتفاء ذاتي وكمان دول بتصدر صناعات لكل الأسواق العالمية.
وأوضح تقرير بانكير، أن مصر ربنا حباها بموقع استراتيجي بيربط بين ثلاث قارات بين آسيا أفريقيا وأوروبا، والموقع عطاها ميزة استراتيجية علشان تكون معبر طبيعي لتبادل الطاقة، مشيرا إلى أن الدولة خلال الفترة اللي فاتت استثمرت ارقام كبيرة في تطوير شبكات الربط الكهربائي مع الدول المجاورة زي السعودية والسودان وليبيا والأردن ده غير الخطوط اللي بيتم عملها دلوقتي مع دول أوروبا من خلال قبرص واليونان.
وأشار تقرير بانكير إلى أن جزء كبير من خطة مصر للتحول لمركز إقليمي لتبادل الطاقة قائمة الي التحول للطاقة النظيفة واللي أصبح أولوية، وفي الوقت الحالي مصر بتستهدف إنتاج 42% من الاستهلاك المحلي للتيار من مصادر متجددة بحلول عام 2030، والوصول ل 65% من الاستهلاك المحلي الطاقة من مصادر الطاقة المتجددة في 2040، والتحول لاستخدام الطاقات المتجددة واحدة من الأهداف اللي مصر أكدت التزامها بتطبيقها وقت استضافة مؤتمر المناخ COP27 لما مصر أكدت وقتها التزامها الدولي بالتحول الأخضر، وفتحت الأبواب قدام الاستثمارات لبجديدة في مشروعات الهيدروجين الأخضر وتكنولوجيا تخزين الطاقة.
وأكد التقرير، أن خطة مصر لتحويل مصر لمركز إقليمي لتبادل الطاقة بتتضمن كمان تحويل مصر لمركز لتبادل المواد البترولية وده بيحصل من خلال الجهود اللي بتقوم بيها الدولة لتعظيم مواردها البترولية من خلال زيادة الاكتشافات البترولية واكتشافات والغاز الطبيعي من خلال زيادة الإنتاج من حقل ظهر واللي تم اكتشافه في 2015، واللي بيعد أكبر حقل غاز في البحر المتوسط واللي معاه تحولت مصر لمصدر رئيسي للغاز الطبيعي المسال إلى أوروبا، خصوصا في ظل الأزمة العالمية للطاقة.
وحدة أبحاث بانكير قدمت تقرير خاص النهاردة عن كنز الفوسفات المدفون تحت الأرض.
كشف تقرير بانكير، أن مصر ناوية تستغل كل كنوزها اللي تحت الأرض، بعد ما تم توقيع مذكرة تفاهم مهمة جدًا بين وزارة البترول المصرية وشركة "آسيا بوتاش" الصينية، بعد ما قررنا نشتغل معاهم سوا في استكشاف وتقييم احتياطيات خام الفوسفات، يعني باختصار كده، احنا مش بس هنقعد نتفرج على الفوسفات وهو مدفون في الأرض، لا دلوقتي فيه شغل جد بيبدأ عشان نعرف الكمية اللي عندنا ونستغلها بأحسن طريقة.
وأوضح تقرير بانكير، أن الشركة الصينية دي هتشارك بخبرتها وتقنياتها في الاستكشاف والتحليل، وده هيساعدنا نوصل لأرقام دقيقة وخرائط واضحة عن الفوسفات الموجود في أراضينا، يعني فرص استثمارية أكبر وشركات تانية ممكن تيجي تستثمر بعد ما تشوف النتايج، وكمان فرص شغل للشباب في المجال ده.. والأهم؟ إننا نبني صناعة قوية حوالين الفوسفات بدل ما نفضل نبيعه خام.
وأضاف التقرير، أننا هنشوف مصر قوية، وده بعد الخطوة الجديدة اللي مصر خدتها لتطوير قطاع التعدين في مصر، بعد ما وزير البترول كريم بدوي حضر توقيع مذكرة التفاهم مع الشركة الصينية، واللي هدفها إننا نشتغل سوا على استكشاف وتقييم احتياطيات خام الفوسفات، وكمان نعظم القيمة المضافة من المورد الحيوي ده، بدل ما نكتفي نطلعه خام ونصدره.
تقرير بانكير كشف كمان أن الوزير أكد بعد التوقيع أن التعاون ده جزء من خطة الوزارة لتطوير قطاع التعدين، وإنهم عايزين يرفعوا مساهمته في الاقتصاد من أقل من 1% لـ 5 أو 6%، يعني مش بس تنقيب، إحنا بنتكلم عن شغل متكامل، عبارة عن استكشاف وتقييم وإثراء ومعالجة ودراسة إنشاء مصنع حديث لإنتاج الأسمدة الفوسفاتية.
